2022 оноос хойш дахин сар бүрэн хиртэж, улбар улаан өнгөтэй болох үзэгдэл тохиох гэж байна. Уг хиртэлт нь 3 сарын 13-14-ний хооронд хиртэх юм.

Хиртэлтийг дараах газруудаас ажиглах боломжтой:

• Хойд Америк – АНУ, Канад, Мексик зэрэг орнуудад бүрэн хиртэлт харагдана.
• Өмнөд Америк – Тивийн ихэнх хэсэгт сар хиртэлтийг ажиглах боломжтой.
• Баруун Европ, Баруун Африк – Хэсэгчилсэн хиртэлт харагдана.
• Номхон далайн бүс – Хавай болон зарим арлуудад хиртэлт ажиглагдана.

Харин Ази, Дундад Ази, Австрали, Зүүн Европын ихэнх хэсэгт энэ хиртэлт харагдахгүй ажээ.

Сар хиртэлт гэж юу вэ?

Сар хиртэлт нь Дэлхий, Нар, Сар нэг шулуунд байрлах үед тохиодог. Энэ үед Дэлхий нарны гэрлийг хааснаар саран дээр сүүдэр тусч, түүний өнгө аажмаар бараантаж эхэлдэг.

Яагаад “Цусан сар” гэж нэрлэдэг вэ?

Сар бүрэн хиртэх үед улаан, улбар шар өнгөтэй болох нь “цусан сар” хэмээдэг юм. Энэ нь нарны гэрэл Дэлхийн агаар мандлаар нэвтрэхдээ богино долгионы (цэнхэр, ногоон) гэрлүүдийг сарниулж, урт долгионы (улаан, улбар шар) гэрлийг сарт хүргэж буйтай холбоотой. Үүнтэй ижил үзэгдэл нар жаргах үед ажиглагддаг.

Сар хиртэх үеийн өнгө нь агаар мандлын нөхцөл байдлаас хамаарна. Хэрэв агаар мандал тунгалаг байвал сар илүү тод, улбар шаравтар харагдана. Харин агаарт тоосонцор их байвал бараан, гүн улаан өнгөтэй болдог. Энэ удаагийн сар хиртэлт нь харьцангуй цэвэр агаар мандлын нөхцөлд тохиох тул саран туяа тод улбар шар өнгөтэй харагдах төлөвтэй байна.