2025 оны 2-р сарын 26-ны өдөр Монгол Улс, Их Британи, Умард Ирландын Нэгдсэн Хаант Улс хоорондын Дугуй ширээний 15 дугаар уулзалт Лондон хотноо амжилттай зохион байгуулагдлаа. Уулзалтад Монгол улсын талаас Шадар сайд С.Амарсайхан, Британийн талаас Гадаад хэрэг, хамтын нөхөрлөл, хөгжлийн яамны Энэтхэг, Номхон далайн асуудал эрхэлсэн сайд Кэтрин Уэст нар тэргүүлж хоёр улсаас нийт 70 гаруй хүн оролцжээ.

Дугуй ширээний уулзалт (“Roundtable discussion”) нь бүх оролцогчид адил тэгш ярилцаж, санал солилцох зориулалттай хэлэлцүүлгийн хэлбэр юм. Уулзалтад оролцогчид ширээний эргэн тойронд сууж, бүх хүн өөрийн үзэл бодлоо илэрхийлэх боломжтой байдаг. Энэ нь нэг хүний удирдлагаар бус, оролцогчдын хамтын шийдвэр гаргалтад тулгуурлаж бизнес, улс төр, боловсрол, нийгэм зэрэг олон салбарт ашиглагддаг.

Энэ удаагийн уулзалтаар хоёр улсын харилцаа, цаашдын хамтын ажиллагаа, томоохон бүтээн байгуулалтуудад хэрхэн хамтран ажиллах талаар өргөн хүрээнд санал солилцож, ярилцсан бөгөөд мөн эмэгтэйчүүдийн чадавхыг бэхжүүлэх, эрчим хүчний шилжилт зэрэг олон сэдвүүдийг өргөн авч ярилцжээ.  

Мөн хоёр улсын хооронд байгуулахаар хэлэлцэж буй “Түншлэл хамтын ажиллагааны хэлэлцээр”-ийг эцэслэн байгуулах чиглэлээр үргэлжлүүлэн ажиллахаар тохиролцжээ.