Европын Холбооны удирдагчид 3 сарын 6-нд Брюссельд батлан хамгаалах асуудлаар тусгай зөвлөгөөнд цуглаж байна. Францын Ерөнхийлөгч Эммануэль Макрон Европ тивийг “түүхэн эргэлтийн цэг”-т ирээд буйг анхааруулжээ.

Уулзалтаар зэвсэглэлээ нэмэгдүүлэхээс гадна АНУ-ын Ерөнхийлөгч Доналд Трамп Украинд үзүүлэх тусламжаа түр зогсоох шийдвэрээ зарласантай холбогдуулан Киевийг хэрхэн үргэлжлүүлэн дэмжих талаар хэлэлцэнэ. Украины Ерөнхийлөгч Валодимор Зеленский уг дээд хэмжээний уулзалтад урилгаар оролцох юм.

Орос Украиныг бүхэлд нь эзлэн түрэмгийлснээс хойш гурван жилийн дараа Трампын засаг захиргаа ОХУ-ын Ерөнхийлөгч Владимир Путинд найрсаг хандлага үзүүлж буй нь Европ даяар АНУ-ын аюулгүй байдлын баталгаанд найдах итгэлийг сулруулж байгаа юм.

Мөн АНУ Украинтай тагнуулын мэдээлэл солилцохоо түр зогсоох шийдвэр гаргасан нь энэ айдсыг бүр ч нэмэгдүүлэв.

Үүсээд буй нөхцөл байдлын ноцтой байдлыг бас нэгэн дохио бол Францын Ерөнхийлөгч Макроны ард түмэндээ хандаж хэлсэн үг байлаа. Тэрээр Францын цөмийн зэвсгийн хамгаалалтыг Европын холбоотнуудад өргөжүүлэх асуудлыг хэлэлцэхэд нээлттэй байгаагаа илэрхийлжээ.

Энэ нь Германы дараагийн канцлераар нэрлэгдээд буй Фридрих Мерцийн цөмийн зэвсгийн хамтын хамгаалалтыг нэмэгдүүлэх талаар хэлэлцэх саналыг дагасан алхам болсон байна.

-BBC