“Асуудал шийдвэрлэдэг хүн ялагч байдаг”. Энэ бол “Ecoger” цэцэрлэгийнхний хүүхддүүддээ өгдөг төлөвшлийн нэгээхэн уриа юм. Уншигч танд “Ecoger Kindergarten” бэлдсэн тэмдэглэлийг хүргэж байна.

Орох төдийд л инээмсэглэл дүүрэн угтаж байгаа нь “Хүүхэд байгаа газар аз жаргал дэлгэрнэ гэдэг л энэ байх” гэсэн бодол сэм төрнө. Уур бухимдлаар дүүрэн энэ нийгэмд ингэж инээмсэглэдэг "газар"  ховор шүү дээ. Цэцэрлэгийн хаалгаар оролгүй удсандаа ч тэр юм уу, орж ирээд бушуухан л ажилдаа орох гэж яаравчлав. Тэгтэл нэгэн эгч ирээд,  халуун аньс өгч, “Ядаж эхлээд юм уучих” гэхэд аль хэдийнээ “хөгширсөн” надад хүүхэд шиг хандсан нь дотор минь нуугдаж байсан жаахан охин гараад ирэх шиг л болов. Тэр энэ цэцэрлэгийн гүйцэтгэх захирал гэнэ. Дулаахан инээмсэглэлтэй тэр эмэгтэй надад цэцэрлэгээ нэгд нэгэнгүй тайлбарлаж өгч байхдаа аз жаргалаар дүүрэн харж байлаа. Үүнийг нь анзаарахад биеэр минь тог гүйх шиг л болсон. “Ажилдаа чин сэтгэлээсээ хайртай хүн ийм байдаг бололтой” гэж бодогдов.  Анги бүрээр зочлоход хүүхдүүдийн захирал эмэгтэйг харах харц,  өчигдөр нь гэртээ болсон үйл явдлаа догдлол дүүрэн “би… би” хэмээн шулганалдах нь, түүнийг нь төвөгшөөхгүй сонсож байгааг нь хараад тэд хэзээний нэг "гэр бүл"  болчхож гэлтэй... 

Дөрвөн давхар уг барилгын 2-р давхарт 1-2 настнуудын анги бий. Удаах давхарт 3 настнуудын анги... зэргээр байрласан нь энэ цэцэрлэгийн зохион байгуулалт энгийн хэр нь сонирхолтой санагдав. Хүмүүс амьдралын бэрхшээлийг шатаар орлуулж ярьдагтай ижил тэд ч бас нас ахих тусам тэдний биед гардаг өөрчлөлтийг шат бүртээ харуулжээ. Нэгхэн давхрын зөрүүтэй ч асар их өөрчлөлт, төлөвшил. 

1-2 настны анги руу орлоо.  Үг хэлэхээс бишүүрхдэггүй, нүүрэмгий , “хиргүй цаас“ шиг хүүхдүүд... Тэд надтай мэндэлж, зарим нь ирж цамцыг минь нусаараа "мялаасан" нь инээд гайхширал хоёрын дунд намайг гацаав. Удалгүй "Бясалгалын цаг" хичээл эхэлсэн бололтой, бүгд багшийнхаа үгэнд орж, дор дороо завилан суугаад, зурагтаар дуугарах тайвшруулах аянд чимээгүйхэн сууцгаав. Нэг өхөөрдөм охин...   ганцаар буланд суух бөгөөд над руу их л сониучирхан харна.   “Шинээр ирсэн хүүхэд болохоор бишүүрхээд байгаа юм аа” гэж захирал багш надад хэлэв.  энэ хүүхдүүдийг ажиглаж суухдаа өөрийн дүү нараа санах шиг... "Нас нэмэхийн хэрээр хүн гэр бүлийнхнээсээ дөлж, өөрийн амьдралыг эхлүүлэх хатуу замд гарж,  нэг ёсондоо эргэн тойрноо тэр болгон анзаараад байдаггүй. Нэг бодлын амиа хичээсэн хүн болдог"-ийг тэр цагаахан хүүхдүүдээс ойлгож авлаа. Хүн болж төрөөд ердөө ганц, хоёр л жилийг өнгөрөөж байгаа хүүхдүүдтэй ойлголцож, тэдэнд зааж сургаж байгаа багш нарыг магтах ёстой мэт санагдана. Хүүхдийг загнаж сургадаг уламжлалт тогтолцоог халж, хайрлахыг зааж байгаа энэ багш нар хүүхдүүдээ өвөр дээрээ суулган ,хамт бясалгал хийж байсан юм. Маш дулаахан санагдав.

Дахин нэг шат ахихад бид 3 настнуудын ертөнцөд ирлээ. Доод давхрын ангийн хүүхдүүдийг бодвол бие нь илүү томорч, үг ярианы сонголтоос эхлээд л хүүхдийн насны ахицыг мэдэрнэ. Хүнээс айж ичих биш, өөртөө итгэх итгэлийг заадаг орчинд өсөж байгаа гэдэг нь тэр хүүхдүүдийн яриа, үйл хөдлөл, харьцаанаасаа шууд харагдана. эндээс л хүмүүн гэгч үргэлж урагшилж байдгийг тэндээс олж харж болох... Хүүхэд бүр өөр өөрсдийн тэмдэгтэй сандал дээр сууж, тэр тэмдгээ хэнээс ч илүү ялгаж, өмчилж байгаа нь  “чамд үргэлж өөрийн гэсэн эд зүйл байдаг шүү, тэрийгээ хамгаалах хэрэгтэй” гэдгийг тэдний тархинд дадал болгож хэвшүүлжээ.

Хүүхдүүд өглөөд хаалгаар орж ирсэн цагаасаа л “чи шилдэг нь, би чамаар бахархаж байна, чи чадна” гэсэн үгсийг харамгүй сонсдог. Мөн өөрийгөө дутуу үнэлэх вий гэдгээс сэргийлж, үргэлж “Эхэлснээ дуусгадаг хүүхэд л ялдаг, чи ялахгүй байж болно. Гэхдээ суралцаж байгаа чинь л хамгийн шилдэг” гэж хэлдэг байна.

Хамгийн дээд талын давхарт байрлах 4 настнууд дээр ирлээ. 2, 3 давхрын ангиас ялгаатай нь энэ давхарт  хаалга байхгүй. Учир нь энэ насны хүүхдүүд маш сайн биеэ дааж сурсан гэдгийг илэрхийлдэг гэнэ.  4 настнуудад “асуудлыг хэрхэн, яаж шийдвэрлэх вэ?, асуудал хаанаас үүсдэг вэ?” гэсэн сэдвийн дор төсөл хичээл ордог байна. Тэд хүүхдүүдэд “Хамгийн амжилттай хүн асуудал шийдвэрлэсэн  хүн байдаг” гэж сургадаг гэдгээ онцлов. Үүдээр ороход жижиг хэмжээтэй, өнгө өнгийн 6 хогийн сав харагдана. Хүүхдүүд  хогоо ангилж хаях зорилготой төсөл хичээлдээ зориулж энэ хогийн савнуудыг авчирчээ.  энэ мэтчилэн үүднээсээ эхлээд л хүүхдийн бүтээлч сэтгэлгээг харуулж байв. Яг одоо тэд “Зохистой цахим хэрэглээ” төслийн хичээлдээ хамрагдаж байна.  Энэ хөтөлбөр нь “Чи утас үзэж болох уу? Яагаад болох юм? Яагаад болохгүй юм? Яагаад чамайг хүмүүс утас бага үз гэдэг юм?" гэх зэрэг “Яагаад” гэх асуултаар дамжуулан хүүхэд өөрийн асуудлаа шийдвэрлэж сурахад туслах зорилготой ажээ. 

Хамгийн сүүлд сургуулийн өмнөх бэлтгэл анги болох  5 настнуудын "нууцлаг ертөнц"-д орж ирлээ. Энэ анги 1-р давхарт байрладаг.  Уг бусдаасаа хамгийн их төлөвшсөн, биеэ даасан хүүхдүүд суралцдаг. Тэд хувцсаа хүртэл өөрсдөө сольж чаддаг бөгөөд тэдэнд зориулсан сандал, шүүгээ хүртэл бий. Хүүхдүүд шатрын дугуйлангийн хичээлдээ  улайран сууж байв. Энэ ангид төрөл бүрийн дэвшилтэт тоглоом, хүүхдийн ярих чадвар болон зохион бодох, уран сэтгэмжийг сайжруулах зорилготой үлгэр яриулдаг булан, сэтгэл санааны байдлыг нь мэдэх болон тайвшруулах хөгжөөнт тоглоомын булангуудыг байршуулжээ. Эдгээр тоглоомууд тэдэнд  өөрийгөө тодорхойлох, үзэл санаагаа илэрхийлэх боломжийг өгдөг байна.  

"Бүх цэцэрлэг энэ жишгээр хүүхдүүдийг сургаасай" гэсэн зорилготойгоор “Ecoger”, “Elf”-ийн хамт олон өөрсдийн хэрэгжүүлдэг энэхүү "Lifetree" сургалтын хөтөлбөрийг

2021 оноос Боловсролын Яаманд хүргүүлснээр, 2024 оноос уг хөтөлбөр улс даяар цэцэрлэгүүдэд бүрэн дүүрнээр хэрэгжиж эхэлжээ. 

Таны "зүгээр л цэцэрлэг" гэж боддог газар хүртэл дотроо ийм олон шинэ амьдрал, шинэ хүнийг үүсгэж байгааг та анзаардаг уу?

Мэдлэгээс илүү дадал зуршлыг хүүхдэд бий болгох зорилготойгоор өдөрт иддэг хоолноос нь авхуулаад хамгийн эрүүл сайныг хийж өгч, дасгал хөдөлгөөн тогтмол хийлгэж, жил болгон дэлхий өндөр хөгжилтэй улсуудын үзэсгэлэн худалдааг зорьж очиж, үргэлж анги танхим сургалтын системээ шинэчилдэг манлайлагчдыг бэлтгэх цэцэрлэгийг бид өнөөдөр онцолж та бүхэнд хүргэлээ.