Монгол Улсын Засгийн газар Гашуунсухайт-Ганцмодын Хил дамнасан төмөр замын хэлэлцээр байгуулах санаачилга гарган, холбогдох хуулийн төслийг Улсын Их Хуралд өргөн мэдүүлжээ. Монгол Улсын Засгийн газар уг хэлэлцээрт гарын үсэг зурах эрхийг Монгол Улсын Уул уурхай, хүнд үйлдвэрийн сайд Ц.Туваан, Зам, тээврийн хөгжлийн сайд Б.Дэлгэрсайхан нарт олгосноор БНХАУ, Монгол Улсын Засгийн газрууд Гашуунсухайт-Ганцмод боомтын хил дамнасан төмөр замыг холбох хэлэлцээрийг байгуулж, батламжилжээ. Энэхүү төсөл нь Монгол Улсын 14 томоохон хөгжлийн төслүүдийн тэргүүлэх төсөл юм.

Гашуунсухайт-Ганцмодын төмөр зам нь 1955 оны хэлэлцээрийн дагуу байгуулагдсан Замын-Үүд–Эрээн чиглэлийн төмөр замын дараа орж буй Монгол, Хятад хоёр улсын хоёр дахь төмөр замын холболт болжээ.

Энэхүү төмөр зам ашиглалтад орсноор Монгол Улсын боомтын хүчин чадлыг хоёр дахин нэмэгдүүлэх бөгөөд нүүрсний экспортын хэмжээ жилд 83 сая тонноос 165 сая тонн болж, өсөх төлөвтэй байгаа юм. Үүний үр дүнд нүүрсний борлуулалтын орлого жилд 1.5 тэрбум ам.доллароор нэмэгдэх боломжтой гэжээ.

Мөн уг хэлэлцээр нь цаашид Шивээхүрэн-Сэхээ, Бичигт-Зүүн Хатавч, Ханги-Мандал зэрэг боомтуудаар төмөр замын холболт хийх боломжийг нээж, Монгол, Хятадын тээвэр ложистикийн уялдаа холбоог улам бүр өргөжүүлэх суурийг тавьж байна.