Төв банкны хуучин захирал Марк Карни Канадын эрх баригч Либерал намын даргын сонгуульд ялж, Жастин Трюдогийн залгамжлагчаар ерөнхий сайдын суудалд суух болсон нь албан ёсны дүнгээс харагдлаа. 59 настай Карни намын гишүүдийн 86%-ийн санал авч, тус сонгуульд 152,000 орчим хүн санал өгснөөс Сангийн сайд асан Христя Фриландыг ялжээ.

-Карнигийн ялалт нь улс төрийн жинхэнэ туршлагагүй гаднын хүн анх удаа Канадын ерөнхий сайд болж буй түүхэн үйл явдал боллоо. Тэрээр Канад, Их Британийн төв банкны захирлаар ажилласан туршлага нь Трамптай харилцах хамгийн сайн бэлтгэгдсэн хүн болохыг нь баталж буй гэж үздэг.

Карни Канадын ерөнхий сайдын албыг хүлээн авах үед улс орон нь АНУ-ын Ерөнхийлөгч Дональд Трампын засаг захиргаатай худалдааны дайнд орооцолдсон төдийгүй удахгүй бүх нийтийн сонгууль явуулах ёстой хүндхэн нөхцөл байдалтай нүүр тулж байна.

Тэрээр хуучин ерөнхий сайд Трюдо энэ оны нэгдүгээр сард өөрийнх нь оронд суух дараагийн ерөнхий сайдыг гаргаж өгөхийг намаасаа хүсэн суудлаасаа огцорчээ.

Трюдо: "Энэ бол үндэстний хувь заяаг шийдэх мөч. Ардчилал зүгээр нэг олддог зүйл биш. Эрх чөлөө зүгээр нэг өгөгддөг зүйл биш. Канад ч бас зүгээр нэг байх  улс биш” 

Улс төрийн туршлагагүй Карни Либерал намыг сэргээн босгож, Трамптай хийх худалдааны хэлэлцээрийг удирдах хамгийн тохиромжтой хүн гэдгээ онцолсон байна. Трамп Канадын экспортод асар их хохирол учруулж болзошгүй нэмэлт татвараар тэднийг сүрдүүлж байгаа энэ үед Карни үүнийг даван гарах чадвартай гэдгээ илэрхийлжээ.

“Америкчууд биднийг хүндэтгэж эхлэх хүртэл манай засгийн газар татвараа хэвээр хадгална” гэж Карни мэдэгдсэн байна.