Хэдийгээр амралтын өдөр хүний сэтгэл санаа сэргэдэг ч зарим хүмүүс "АМРАЛТЫН ӨДРИЙН СИНДРОМ" гэж нэрлэгддэг сэтгэл зүйн хямралд ордог байна. Энэ нь амралттай өдрүүдийн төгсгөлд (ихэвчлэн ням гарагт) хүмүүсийн сэтгэл санааны байдал хүндэрч, стресст автах үзэгдэл юм. Уг сэтгэл зүйн байдал нь ихэвчлэн ажлын дарамттай холбоотой байдаг.

Түгшүүр: Ажлын өдрүүдэд хийх ёстой ажлын хэмжээ, хүлээж буй үүрэг хариуцлагууд нь хүмүүсийн сэтгэл зүйд дарамт үүсгэдэг. Энэ нь амралт дуусах тусам илүү хүчтэй мэдрэгдэж, даваа гарагийн өглөө хүмүүсийн түгшүүрийн түвшин нэмэгддэг.

СУДАЛГАА:  Millennials болон Gen Z-ийн үеийнхний 90 гаруй хувь "АМРАЛТЫН ӨДРИЙН СИНДРОМ"-д өртдөг

Амралтын өдрийн синдромын шалтгаан

Ажлын дарамт: Ажлын бүтээмж, үүрэг хариуцлага, ажлын нөхцөл байдал нь энэ синдромыг үүсгэх гол шалтгаан болдог. Ажлын их дарамттай, хэт хариуцлагатай хүмүүс амралттай өдрүүдэд ч ажлын тухай бодолгүй амрахад хэцүү.

Зогсоо зайгүй ажиллах: Хэрэв амрах цаггүй ажилладаг бол амралтын өдрүүд нь илүү их стресс үүсгэдэг. Эдгээр хүмүүс амрах цагаа зөв зохион байгуулж чаддаггүй тул амралт дуусахын өмнө ажлын дарамттай холбоотой сэтгэл зүйн хямрал үүсдэг.

Сэтгэл зүйн төлөв байдал: Сэтгэл зүйн сөрөг хандлага буюу гутрал, түгшүүр, ажлын талаар байнга сөрөг бодолтой байх нь амралтын өдрийн синдромыг илүү хурцатгаж болзошгүй.

Амралтын өдрийн синдромыг хэрхэн даван туулах вэ?

1.             Ажлын хуваарийг зөв зохион байгуулах: Ажлын дарамтыг бууруулахын тулд ажлын хуваарийг урьдчилан зохион байгуулж, амралтын өдрүүдэд стресс үүсгэхгүй байхын тулд тодорхой ажлуудыг хойш тавьж болох юм.

2.             Эрүүл амралтын төлөвлөгөө: Амралтын өдрүүдэд зөв амрах, эрүүл хооллох, биеийн тамирын дасгал хийх нь стрессийг бууруулахад тусална. Энэ нь сэтгэл зүйн хувьд илүү тайван, эерэг мэдрэмж төрүүлэхэд чухал үүрэг гүйцэтгэдэг.

3.             Өөртөө цаг гаргах: Амралтын өдрүүдэд өөртөө цаг гаргах, зугаалгаар явж, шинэ зүйлс туршиж, амралттай үедээ стрессээ зохицуулах нь сэтгэл зүйн хувьд чухал ач холбогдолтой.

4.             Амралттай өдрүүдийн хуваарийг илүү уян хатан болгох: Ажил, амралтын хуваарь хэтэрхий хатуу, тодорхой байснаар стресс үүсгэдэг. Амралтын өдрүүдийн хуваарийг илүү уян хатан, чөлөөт байлгах нь сэтгэл зүйн хувьд амрахад тусална.