Монгол Улсын Ерөнхий сайд Л.Оюун-Эрдэнэ нь 2025 оны 2 сарын 14-нд Азийн өвлийн IX наадмын хаалтын ёслолд БНХАУ-ын Төрийн зөвлөлийн Ерөнхий сайд Ли Цянтай уулзахаар Хятад улсын Харбин хотод айлчилжээ.

Ли Цян нь уулзалтын үеэр “Хятад, Монгол хоёр улс уул усны хэлхээгээр холбогдсон найрсаг хөршүүд” гэж онцолж, мөн ойр хамтран ажиллаж, хамтын хөгжлийг дэмжих нь хоёр талын эрх ашигт нийцэх болно гэж хэлсэн юм.

Тэрээр хоёр улсын төрийн тэргүүн нарын тохиролцоог үргэлжлүүлж, улс төрийн харилцан итгэлцлийг бэхжүүлэн, харилцан ашигтай хамтын ажиллагааг гүнзгийрүүлж, хоёр ард түмэнд бодит үр дүнг бий болгоход бэлэн байгаагаа онцолжээ.

Мөн Хятад улс Монгол Улстай хөгжлийн стратеги, бодлогын уялдааг сайжруулж, хоёр талын хамтын ажиллагааны эерэг хандлагыг хадгалан, уул уурхай, эрчим хүч, тээвэр ложистикийн салбар дахь уламжлалт хамтын ажиллагаагаа өргөжүүлэхийн зэрэгцээ хиймэл оюун ухаан, ногоон хөгжил зэрэг шинэ салбарт хамтарч ажиллахад бэлэн байгаагаа илэрхийлэв.

Монгол Улсын Ерөнхий сайд Л.Оюун-Эрдэнэ Азийн өвлийн IX наадмыг амжилттай зохион байгуулсанд Хятадын талд халуун баяр хүргэж, уг арга хэмжээ нь Азийн үнэт зүйлсийг түгээн дэлгэрүүлж, Азийн дуу хоолойг олон улсад илүү хүчтэй нөлөөлөхөд хувь нэмэр оруулна гэдэгт итгэж байгаагаа хэлжээ. Мөн Монгол, Хятад хоёр улс мөнхийн хөршүүд гэдгийг онцолж, Хятад улстай урт хугацааны, тогтвортой, найрсаг харилцааг хөгжүүлэх нь Монгол Улсын гадаад бодлогын тэргүүлэх чиглэл болохыг дурдав.