Монголын нийгэмд түүхч С.Молор-Эрдэнийн гаргасан зарим мэдэгдэл олон нийтийн эсэргүүцэл, шүүмжлэлтэй тулгарч, иргэд, эрдэмтэд түүний байр суурийг эрс буруутгаж байна. Тухайн хувь хүний үзэл бодолтой санал нийлэхгүй байх, түүхийг өөрөөр тайлбарласныг нь мэтгэлцээний журмаар няцаах нь ардчилсан нийгмийн зүй ёсны зарчим. Гэвч асуудлын гол нь хэн нэгний хэлсэн үгэнд бус, түүнд хандаж буй төрийн институцийн хандлага, хуулийг сонголттой хэрэгжүүлж буй давхар стандартад оршиж байна.

Гишүүний тэмдэглэснээр, эрх баригчид таалагдаагүй иргэд, шүүмжлэгчдийг хэдхэн цагийн дотор шалган хорих хурдан системтэй болжээ. Гэтэл Төрийн ордон дотор яригдсан хэдэн их наядын авлига, албан тушаалын хэргүүд Авлигатай тэмцэх газарт (АТГ) шилжсэн нэрээр замхарч, хэрэг нь хаагддаг жишээ цөөнгүй. Энэ нь хууль хүн бүрд тэгш үйлчлэхээ болиж, эрх баригчдад хамааралгүй иргэдэд төр "төмөр нүүр"-ээ харуулж буйн илрэл юм.

Сонгуулийг угтсан тактик ба хараат байдал

Ирэх 2027 оны ерөнхийлөгчийн болон 2028 оны УИХ-ын сонгуулийг угтан төсвийг 10 их наядаар нэмэгдүүлж буйг сөрөг хүчин шүүмжилж байна. Хямд зээл, урьдчилгаагүй орон сууц гэх мэт төрийн хөнгөлөлтүүд нь бодит байдал дээр шүүмжлэл хэлдэггүй, дарга нартай ойр "томоотой" иргэдэд хүртээмжтэй хуваарилагдах эрсдэлтэй. Энэ нь нийгмийг бүхэлд нь төрөөс хараат байлгах, шүүмжлэгч залуусыг шахан зайлуулах тактик гэж  анхааруулав.

Нигмийн үр дагавар

Хуулийг үзэмжээр хэрэгжүүлдэг ийм тогтолцоо бэхжих нь дараах шууд сөрөг үр дагаврыг дагуулна:

• Төр хүчирхэгжих: Төр иргэдийн амьдрал, эдийн засгийг бүрэн хяналтандаа авах.

• Иргэдийн ядуурал: Хувийн хэвшил хумигдаж, иргэд зөвхөн төрийн халамжаас хамааралтай болох.

• Залуусын дайжилт: Чөлөөт өрсөлдөөн ба шударга ёс алдагдснаар залуу үе гадаад руу цагаачлах.

Хуулийн засаглал бус хувийн үзэмжийн систем тогтож байгаа нь Монгол Улсын ардчилсан тогтолцоо болон хүний эрхэнд том аюул учруулж байна.