УИХ-ын гишүүн С.Цэнгүүн шатахууны нийлүүлэлт, үнийн зохицуулалт болон төрийн хэт оролцооны талаар шүүмжлэв. Тэрээр өнөөгийн нийгэмд тулгамдаж буй хомсдол, дараалал, чанаргүй үйлчилгээний гол шалтгаан нь олон жилийн турш бүрэлдэн тогтсон монополь систем болон улс төрийн бүлэглэлүүдийн ашиг сонирхолтой шууд холбоотой хэмээн онцолж байна.

Ялгавартай тусгай зөвшөөрөл ба "Клиентелист" бүлэглэл

МАН дангаараа засаглах хугацаандаа шатахуун импортлох тусгай зөвшөөрлийг ердөө цөөхөн хэдэн компанид "ялгавартай" байдлаар олгож ирсэн. Энэхүү давуу байдлын хариуд  дарга нар тэдгээр компаниудын үнийг хатуу тогтоох тохиролцоонд хүрдэг.

Төрөөс тусгай эрх аван, өрсөлдөөнгүй орчинд ажиллаж буй эдгээр бүтцийг "Клиентелист бүлэглэлүүд" гэж нэрлэдэг.

Жинхэнэ бизнес биш: Тэдэнд инноваци нэвтрүүлэх, чанараа сайжруулах, үнээ бууруулах сонирхол байхгүй.

Эрсдэлгүй ашиг: Алдагдлыг нь татвар төлөгчдөөр нөхүүлж, өрсөлдөгч орж ирэх хаалгыг төр өөрөө хааж өгдөг.

Сонгуулийн санхүүжилт: Иймээс тэд өөрсдөд нь тусгай боломж олгодог улстөрчдийг ямар ч үнээр хамаагүй дахин сонгуулахын төлөө ажилладаг.

Зах зээлийн жам ёсыг гажуудуулсны төлөөс

Чөлөөт өрсөлдөөнийг боомилсны гол хохирогч нь жирийн иргэд болж байна. Социализмын үеийнх шиг ахуйн хэрэглээгээ хязгаарлуулж, мөнгөө төлөөд ч бараагаа авч чадахгүй оочерлох эдийн засгийн гаж тогтолцоо үүссэн.

"Шатахуун, эрчим хүч, мах, утаагүй түлш гээд жишээ зөндөө бий..."

Үнийг тушаалаар буулгах боломжгүй. Улстөрчдийн ярьдаг "үнэгүй", "хөнгөлөлттэй", "хямд" гэх үгс бүхэн цаанаа иргэдийн төлсөн татвараас гарч байдаг.

• Өнөөдөр татвараар төлөхгүй бол маргааш инфляциар төлнө.

• Инфляциар төлөхгүй бол гадаад өрөөр төлнө.

• Эцэгт нь чанаргүй, тасалдалтай төрийн үйлчилгээ болон гомдолтой хомсдолоор иргэд хохирдог.

Төрийн хариуцлага ба Иргэдийн буруутгал

Энэ бүх бүтэлгүйтлийн эцэст төр өөрийн гаргасан алдаагаа иргэдэд тохож байгаа нь хамгийн хариуцлагагүй үйлдэл юм. "Шатахууны шуурхай штабын зөвшөөрснөөс илүү ихийг хэрэглэх гэсэн нь иргэдийн буруу" хэмээн төр ичихгүй дайрч байгаа нь туйлын эгдүүцэм үзэгдэл хэмээн С.Цэнгүүн гишүүн мэдэгдлээ.