Эрх мэдэл, албан тушаалаа урвуулан ашиглаж, өөртөө болон бусдад давуу байдал олгосон дараах хэргүүд шүүхэд шилжлээ.

Төрийн сангийн төлөөлөгч хахууль өгсөн хэрэг: Иргэн Х.Д нь аймгийн төрийн сангийн төлөөлөгчөөр ажиллаж байхдаа худалдан авах ажиллагааны сургалтад суугаагүй ч тэнцсэн мэтээр хуурамч гэрчилгээ авчээ. Улмаар үнэлгээний хорооны гишүүн болж, өөртөө давуу байдал үүсгэхийн тулд Төрийн өмчийн бодлого, зохицуулалтын газрын мэргэжилтэнд хахууль өгсөн байна. (Эрүүгийн хуулийн 22.5-2 буюу Хахууль өгөх)

ОНӨААТҮГ-ын захирал өөртөө тусламж олгож, ажиллаагүй хүнд цалин өгсөн хэрэг: Дүүргийн Тохижилт үйлчилгээний газрын захирал асан Д.Ө нь журмаа зөрчин, зөвлөлийн хурлын шийдвэргүйгээр өөртөө 8 сая төгрөгийн буцалтгүй тусламж олгожээ. Мөн Г.Ш гэгчийг жолоочоор томилсон нэр зүүж, 2025 оны 5-12 дугаар сар хүртэл огт ажиллаагүй байхад нь 21 сая төгрөгийн цалин олгож, давуу байдал үүсгэсэн байна. (Эрүүгийн хуулийн 22.1-1 буюу Эрх мэдэл, албан тушаалаа урвуулан ашиглах)

Амаржих газрын дарга хууль бус төлбөр хураасан хэрэг: Амаржих газрын дарга асан А.Ж нь "байгууллагын 60 жилийн ойд зарцуулна" гэх нэрээр харьяаллын бус төрөх эхчүүдээс тус бүр 150,000 төгрөг хураах үүргийг ажилчдадаа өгчээ. Ингэж 2018-2021 оны хооронд нийт 65 сая төгрөгийг бэлнээр төвлөрүүлж, өөртөө давуу байдал бий болгосон байна. (Эрүүгийн хуулийн 22.1-1 буюу Эрх мэдэл, албан тушаалаа урвуулан ашиглах)