Өмнөговь аймаг, Ханбогд сум — Монгол Улсын эрчим хүчний найдвартай ажиллагааг бэхжүүлэх, өсөн нэмэгдэж буй цахилгаан эрчим хүчний хэрэгцээг хангахад чухал дэмжлэг үзүүлэх "Зэс-Оюу" 220 кВ-ын хуваарилах байгууламж 2026 оны 8 дугаар сарын 3-ны өдөр албан ёсоор ашиглалтад орлоо.  

"Оюу толгой" компанийн санхүүжилтээр баригдсан энэхүү манлайлах бүтээн байгуулалт нь Монгол Улсын төвийн эрчим хүчний системийг Өвөр Монголын Өөртөө Засах Орон (ӨМӨЗО)-ны эрчим хүчний системтэй зэрэгцээ ажиллагаанд залгах техникийн боломжийг нээж байгаа юм.  

Төвийн бүсийн ачааллыг бууруулж, системд дэмжлэг үзүүлнэ

Монгол Улсын эрчим хүчний хэрэглээ жил бүр 6–8 хувиар өсөж, 2025 онд оргил ачааллын үеэр 1,700 МВт хүрсэн бөгөөд цаашид ч тасралтгүй нэмэгдэх төлөвтэй байна. Шинэ байгууламж ашиглалтад орсноор: 

 Импортын нэмэлт эх үүсвэр: ӨМӨЗО-оос 80 МВт хүртэлх цахилгаан эрчим хүчийг нэмэлтээр импортлон Өмнөд бүсийн зарим хэрэглэгчдийг хангах боломжтой боллоо.  

 Төвийн сүлжээний ачаалал багасна: Энэхүү импортын хэмжээ нь Чингэлтэй, Налайх дүүргийн хэрэглэгчдийн нийт хэрэглээ (84.7 МВт) Сүхбаатар дүүргийн 55,000 хэрэглэгчийн хэрэглээтэй (90.4 МВт) ойролцоо ачааллыг төвийн бүсийн системээс хөнгөлөх хэмжээний дэмжлэг болох юм.  

 Эрчим хүчний аюулгүй байдал: Цахилгааны хязгаарлалт багасаж, нэгдсэн сүлжээ найдвартай, тогтвортой ажиллахад чухал нөлөө үзүүлнэ.  

Төслийн хэрэгжилт ба онцлох тоонууд

Барилга угсралтын ажлыг Эрчим хүчний яамны хүсэлтээр 2024 онд эхлүүлсэн бөгөөд Цахилгаан Дамжуулах Үндэсний Сүлжээ ТӨХК үндсэн гүйцэтгэгчээр ажиллажээ. Энэхүү төсөл нь Оюу толгойн уурхайн цогцолборт байрлах 220 кВ-ын 6 оруулгатай, 3 км урт цахилгаан дамжуулах агаарын шугам бүхий иж бүрэн байгууламж юм.