Хотын дарга Х.Нямбаатар өнөөдөр цаг үеийн асуудлаар мэдээлэл өглөө. Ингэхдээ олон жил дуншиж байгаа Улаанбаатар хотод метро барих асуудал ямар түвшинд  явж байгаа талаар мэдээлэл өгсөн юм.

Тэрбээр “ Ерөнхийдөө метротой холбоотой санхүүжилтийн асуудал шийдэгдсэн. Энэ долоо хоногт Их британийн засгийн газар  манай засгийн газарт 3 тэрбум фунт стерлинг 15 жилийн хугацаатай метроны төсөлд гаргах албан бичгийг ирүүлэхээр болсон.  Ингэснээр бид метроны тендерийг зогсоохгүйгээр явуулах боломжтой болж байна. Ерөнхийдөө санхүүжилтийн сайн хэрэгслээ ашиглаж метроны санхүүжилтийг босгох чиглэл рүүгээ явж байгаа бөгөөд синдикат банкнуудтай ирэх 1,2-р сард уулзалт хийхээр төлөвлөж байна.

“ТОМИЛОЛТ АВЛАА ГЭЭД ШҮҮМЖЛҮҮЛЭЭД БАЙГАА УЧРААС ГАДААД ЯВАХ БОЛОМЖГҮЙ БАЙНА. ТИЙМЭЭС ОНЛАЙН УУЛЗАЛТ ХИЙХ ЭСВЭЛ ТЭДНИЙГ МОНГОЛД УРИХ АЖЛЫГ ЗОХИЦУУЛЖ БАЙГАА”

 Үргэлжлүүлэн “Би хоёр сар гаруй хугацаанд хэвлэлд гараагүй. Энэ хугацаанд нийслэлийн 2028 он хүртэлх том байгуулалт болох агаарын бохирдлыг бууруулах, барилгажуулах, гэр хорооллыг орон сууцжуулах, түгжрэлийг бууруулах зэрэг төсөл хөтөлбөрүүдийг боловсруулахад анхаарах, мөн шаардлагатай төсөл хөтөлбөр, схемийг боловсруулах, санхүүжилтийг татах  зэрэг төлөвлөгөөт ажлуудыг хийж байна” гэдгийг хэллээ.