ХӨСҮТ-өөс Томуу, томуу төст өвчний нөхцөл байдлын талаар мэдээлэл өглөө. ХӨСҮТ-ийн дэд захирал О.Батбаяр:

- Томуу, томуу төст нь хоорондоо ялгаатай. Томуу төст өвчний шинж тэмдэг бол нус гоожих, халуурах, ханиалгах шинж тэмдгээр бага насны хүүхдүүдэд илүү илэрч байгаа. Харин Томуу бол илүү хүнд хэлбэрээр явагддаг, амь насанд аюул учруулдаг төрлийн вирус. Энэ үед толгой өвдөх, цээжээр өвдөх, булчин, үе мөчөөр өвдөж богино хугацаанд хүндэрдэг онцлогтой бөгөөд насанд хүрэгчид илүү өртөж байна. 

Томуугийн вирус бол Covid-19-ийн шинж тэмдэгтэй төстэй хүний дархлааны хариу урвалаас зайлсхийж чаддаг. ХӨСҮТ-ийн улсын хэмжээнд хийсэн тандалт судалгаагаар хүндрэл үүсгэдэг томуугийн вирус нийт вирусийн 30-35 хувийг эзэлж байна. Энэ долоо хоногт бараг 50 хүртэлх хувь руу орох болов уу гэж бодож байна.

"Энэ долоо хоногийн сүүлээр гадуур байгаа вирусийн 50 хувь нь томуу болно гэхээр нөхцөл байдал улам хүндэрнэ гэсэн үг. Өөрөөр хэлбэл эмнэлгүүд дээр 15-аас доош насныхан нийт өвчлөлийн 80 хувийг эзэлж байсан бол одоо насанд хүрэгчид өвчлөх эрсдэл илүү нэмэгдэж байна."

Мөн томуугаас шалтгаалан зүрхний шигдээс, тархины харвалт үүсэх эрсдэлтэй байдаг. Тиймээс ялангуяа өвчний эрсдэлт бүлэг болох жирэмсэн эмэгтэйчүүд, 65-аас дээш насны ахмад настан, дархлаа сул хүмүүс болон бага 0-5 насны хүүхдүүд томууг хүндэрсэн хойно нь эмнэлэгийн байгууллагад хандах биш шинж тэмдэг илэрсэн үед шууд эмчид хандахыг мэргэжлийн байгууллага анхаарууллаа.