Дэлхийн усны түншлэлийн байгууллагаас (GWPO) Монгол Улсын Ерөнхий сайд асан Л.Оюун-Эрдэнийг Ази, Номхон далайн бүсийн Ус, уур амьсгалын тэсвэртэй байдлын хөрөнгө оруулалтын дээд түвшний комиссын Дэлхийн манлайлагч бөгөөд Тусгай элчээр томилов.

Энэхүү томилгоог "Дэлхийн усны долоо хоног 2026" арга хэмжээний үеэр 28 орны төлөөлөгч оролцсон Ус ба эдийн засгийн дипломат ажиллагааны Дэлхийн элчин сайд нарын форумын нээлт дээр албан ёсоор зарласан бөгөөд түүний бүрэн бүрэн эрхийн хугацаа 2030 оны 12 дугаар сарын 31-нийг хүртэл үргэлжилнэ.

Үндсэн зорилт ба хөрөнгө оруулалт

• 150 тэрбум ам.доллар дайчлах: Азийн хөгжлийн банкны тооцоолсон бүс нутгийн усны салбарын жилийн 150 тэрбум ам.долларын хөрөнгө оруулалтын зөрүүг арилгах, уур амьсгалд тэсвэртэй төслүүдэд санхүүжилт татах.

• Бүс нутгийн хамтын ажиллагаа: Ази-Номхон далай, Африк болон Латин Америкийн орнуудын хооронд усны салбарын туршлага, манлайлал солилцох "Өмнөд-Өмнөд" эдийн засгийн харилцааг идэвхжүүлэх.

• Албан ёсны нээлт: Тус комиссыг 2026 оны 12 дугаар сард Абу Дабид болох НҮБ-ын Усны бага хурлын үеэр албан ёсоор нээхээр төлөвлөжээ.

Л.Оюун-Эрдэнэ Ерөнхий сайдаар ажиллах хугацаандаа усны хомсдолтой Монгол улсын хувьд уул уурхай болон усны дэд бүтцийг уялдуулах, 2030 он гэхэд нийт нутаг дэвсгэрийн 30 хувийг тусгай хамгаалалтад авах зэрэг тодорхой бодлого хэрэгжүүлсэн. GWPO-ийн дарга Пабло Бересиартуа түүний үндэсний хэмжээнд усны сорилттой нүүр тулан ажиллаж байсан туршлага, дипломат нэр хүнд нь бүс нутгийн хэмжээнд улс төрийн манлайлал болон санхүүжилт дайчлахад чухал нөлөө үзүүлнэ гэж онцоллоо.