Өглөө бүр нэг аяга кофе уух нь олон хүний хувьд өдрийг эхлүүлэх хамгийн чухал дадал. Харин энэ зуршил зөвхөн сэргээх үйлчилгээтэй биш эрүүл мэндэд ч эерэг нөлөө үзүүлж болохыг сүүлийн жилүүдэд хийгдсэн томоохон судалгаанууд харуулж байна. Их Британийн UK Biobank-ийн 450 мянга гаруй хүнийг хамарсан судалгаагаар өдөрт 2–3 аяга кофе тогтмол уудаг хүмүүсийн нас барах эрсдэл кофе огт хэрэглэдэггүй хүмүүстэй харьцуулахад бага байжээ. Судалгааны үр дүнг Европын Зүрх Судлалын Нийгэмлэгийн хуралд танилцуулж дараа нь олон улсын хэвлэлүүд мэдээлсэн. Судалгааны үеэр зөвхөн хар кофе бус нунтаг, уусдаг болон кофе машинаар бэлтгэсэн кофены нөлөөг ч харьцуулан үзжээ. Үр дүн нь ямар төрлийн кофе байсан ч өдөрт 2–3 аяга уух нь хамгийн их ашигтай байж болохыг тогтоосон байна.

Яагаад кофе ашигтай гэж?

Кофенд агуулагддаг полифенол, антиоксидант зэрэг бодисууд нь бие махбод дахь үрэвслийг бууруулж эсийг хамгаалах үйлчилгээтэй гэж эрдэмтэд үздэг. Мөн кофе нь:

                •              Зүрх судасны өвчний эрсдэлийг бууруулна.

                •              2-р хэлбэрийн чихрийн шижин үүсэх эрсдэлийг багасгана.

                •              Элэгний зарим өвчнөөс хамгаална.

                •              Тархины өвчин зэрэг мэдрэлийн тогтолцооны эмгэгийн эрсдэлийг бууруулахтай холбоотой байж болзошгүйг өмнөх олон судалгаа харуулсан.

Бүх кофе адил биш

Эрдэмтэд нэг зүйлийг онцгойлон анхааруулж байна. Судалгаанд дурдсан ашиг тус нь их хэмжээний элсэн чихэр, сироп, крем, амт оруулагчтай кофе хамаарахгүй.

Өөрөөр хэлбэл өдөр бүр карамель сироп, өтгөн крем, их хэмжээний сахар хийсэн кофе уух нь илчлэгийг эрс нэмэгдүүлж, таргалалт болон бодисын солилцооны эмгэгийн эрсдэлийг өсгөж болзошгүй юм.

 Хэдэн аяга тохиромжтой вэ?

Ихэнх судалгаагаар хамгийн эерэг үр дүн өдөрт 2–3 аяга кофе хэрэглэдэг хүмүүст ажиглагдсан. Харин 5–6 аягаас дээш хэмжээгээр уух нь зүрх дэлсэх, нойргүйдэх, түгшүүр нэмэгдэх зэрэг сөрөг нөлөө үзүүлэх эрсдэлтэй.

 Мөн жирэмсэн эмэгтэйчүүд, цусны даралт өндөртэй хүмүүс, кофейнд мэдрэмтгий хүмүүс эмчийн зөвлөгөөг дагаж хэрэглэх шаардлагатай.

Судалгаа юу хэлж байна вэ?

 Эрдэмтэд кофе урт наслах шалтгаан гэж дүгнээгүй. Харин өдөрт 2–3 аяга кофе тогтмол хэрэглэдэг хүмүүсийн дунд нас баралт болон зүрх судасны өвчний эрсдэл статистикийн хувьд бага байсныг тогтоосон юм. Өөрөөр хэлбэл кофе нь эрүүл амьдралын хэв маягийг орлохгүй, харин зөв хооллолт, тогтмол хөдөлгөөн, хангалттай нойртой хосолсон тохиолдолд эрүүл мэндэд эерэг нөлөө үзүүлж болох нэг хүчин зүйл гэж судлаачид үзэж байна.