Ерөнхийлөгч Доналд Трамп 2 сарын 28-нд Цагаан ордонд болсон уулзалтын үеэр Украины Ерөнхийлөгч Валадимор Зеленскийг “хүндэтгэлгүй” хандлаа хэмээж, улмаар Украинтай байгуулах гэж байсан ашигт малтмалын гэрээг гэнэт цуцалсан байна. Тус гэрээ нь Оросын эсрэг дайндаа ялалт байгуулахад Украинд дэмжлэг болох чухал алхам байжээ.

Энэ үйл явдал Европ болон дэлхий дахины нөхцөл байдлыг эрс өөрчилж магадгүй болоод байна. Зеленский Трамптай уулзахдаа АНУ-д Украины ховор металл, эрдэс баялагт илүү өргөн хүрээтэй нэвтрэх боломж олгох гэрээнд гарын үсэг зурахаар төлөвлөж, хамтарсан хэвлэлийн бага хурал хийх байсан ч хоёр улсын удирдагчдын халуун маргаанаас үүдэн уг төлөвлөгөө цуцлагдсан байна. Уг уулзалтад Ерөнхийлөгч Трамп болон зарим АНУ-ын сэтгүүлчид Ерөнхийлөгч Зеленский рүү илт дайрсан өнгө төрхтэй харьцаж байсан ба энэ талаар олон нийт Трампад эрчимтэй дургүйцлээ илэрхийлсээр байна.

Уг гэрээ нь АНУ-ын дайн эхэлснээс хойш Киевт илгээсэн 180 тэрбум ам.доллар давсан тусламжийн хариуд Киевээс ашигт малтмал авах гэрээ байсан ч одоо гэрээ цаашид яах нь тодорхойгүй байна. 

Трамп Зеленскийд хандан: “Чи гуравдугаар дайн өдөөхтэй тэнцэх хэмжээний эрсдэл үүсгэж байна. Чамайг хамгийн их дэмжсэн энэ улсад ингэж хүндэтгэлгүй хандаж болохгүй” гэж уулзалтын үеэр хэлсэн байна.

45 минут үргэлжилсэн уулзалтын сүүлийн 10 минут маш хурц, маргаантай өнгөрсөн бөгөөд Трамп, Дэд ерөнхийлөгч Ж.Д. Ванс болон Зеленский нар Оросын дипломатын амлалтуудад итгэх эсэх талаар мэтгэлцжээ. Зеленский энэ уулзалтаар Трампыг Украинтай холбоогоо таслахгүй байхыг ятгах, Оросын Ерөнхийлөгч Владимир Путинтэй хэт ойртохоос сэргийлэхийг сануулах зорилготой байсан ч харин эсрэгээрээ Трампын уур бухимдлын бай болж, Трамп камерын өмнө нөхцөл байдлыг улам дөвийлгөн харуулсан байна.