Ерөнхийлөгч Доналд Трампын удирдлага дор АНУ Атлантын харилцаанд томоохон өөрчлөлт хийж, Европын холбоотнуудаасаа зөрөн, НҮБ-ын гурван тогтоолын санал хураалтад Оросыг Украин руу халдсан гэж буруутгахаас татгалзав.

Атлантын харилцаа гэдэг нь АНУ болон Европын орнуудын хоорондох улс төр, эдийн засаг, аюулгүй байдал, соёлын харилцааг хэлсэн юм.

Нэгдсэн Үндэстний Байгууллага (НҮБ) нь Орос, Украины хоорондын дайны талаар одоогоор гурван тогтоол баталсны сүүлийнх буюу гурав дахь нь 2 сарын 24-ны өдөр болсон Москвагийн түрэмгийллийг буруутгаж, Оросын цэргийг даруй татахыг шаардаж байгааг дэмжих эсэх дээр санал хураалт явуулжээ. Уг санал хураалтад АНУ Оросын талд орж, Европын орнуудын дэмжсэн Украины тогтоолд эсрэг санал өгсөн.

Ийнхүү зөрчилдөх болсон нь Трампын Оростой шууд хэлэлцээр эхлүүлэх шийдвэртэй холбоотой бөгөөд өнгөрсөн долоо хоногт Ерөнхийлөгч Трамп Оросын Ерөнхийлөгчтэй дайныг зогсоох талаар хэлэлцсэн хэлэлцээнд Украин болон Европын холбоотнуудыг оролцуулаагүй нь тэднийг бухимдуулжээ.

Харин үүний дараа Францаар тэргүүлсэн Европын орнууд анх АНУ-ын санаачилсан тогтоолд Оросыг түрэмгийлэгч хэмээн тодорхой дурдсан өөрчлөлт оруулсны улмаас АНУ өөрийн санал болгосон тогтоолд санал өгөхөөс түдгэлзжээ. Санал хураалт нь Оросын Украинд халдсаны гурав дахь жилийн ойтой давхцаж, Трамп Вашингтонд Францын Ерөнхийлөгч Эммануэл Макронтой уулзаж байсан үед болж өнгөрсөн юм.