"Өөрчлөлтийн хөтөч сэтгэлзүйн төв" -ын үүсгэн байгуулагч сэтгэлзүйч Б.Хишигдэлгэр

 1. Сүүлийн үед донтолтын шалтгаанаар хүмүүс хэр их зөвлөгөө тусламж авч байгаа вэ?

Сүүлийн 1-2 жилд хүмүүс мөрийтэй тоглоом болон Online Bet -д их донтож байгаа. Ихэнхдээ энэ талаар зөвлөгөө авахаар ар гэрийн хүмүүс нь ирдэг. Өмнө нь бол архины асуудлаар гэр бүлийнхэн нь зөвлөгөө болон сургалт авахаар их ирдэг байсан. 

2. Донтолттой хүмүүсийн сэтгэлзүй нь ямар байдаг вэ?

Аливаа хамааралтай хүмүүсийн дотоод сэтгэл нь маш их гэмшил, харуусал, буруутгал, найдваргүй байдал, цөхрөлийг мэдэрдэг. Ямар нэгэн ангалд уначхаад гарч чадахгүй байгаа юм шиг хүнд мэдрэмжүүдийг үүрсэн байдаг. Донтолтыг хамгийн их гүнзгийрүүлдэг зүйл нь “ҮГҮЙСГЭЛ” юм. “Би энэ асуудалд ороогүй. Би өөрийгөө удирдаж чадна” гэдэг өөрийгөө өмгөөлж байгаа үгүйсгэлээсээ болоод донтолт улам хүндэрдэг. Жишээ нь архинд донтсон хүмүүс “Би арай ч гудамжинд суудаг архичин болоогүй шүү дээ. Архинд ороод яадгаа алдаагүй байна” гээд уугаад байдагтай ижил. Харин OnlineBet, Хар тамхи мэт нь хүнд мэдэгдэхгүйгээр даамжрах асуудалтай байдаг. Тэгэхээр донтсон хүмүүс өөрийгөө бусад хүмүүстэй харьцуулахын оронд өмнөх 5 жилийн өөртэйгөө харьцуулах ёстой.

3. Эдгээр хүмүүсийн ар гэрийнхэн, ойр дотнын хүмүүст ямар зөвлөгөө өгөх вэ?

-Ар гэрийнхэн нь маш их түгшсэн мэдрэмж авдаг. Энэ мэдрэмжээсээ болоод “засна, засарна” гэж итгэж, өөрөө ч мэдэхгүйгээр нөгөө хүнээ буруутгаж байдаг. Манайхаар үйлчлүүлдэг донтолттой хүмүүсээс харахад ар гэрийнхэн нь “Чи тоглоод л байна уу? Чи ч гарж чадахгүй л дээ. Чамаас болж энэ амьдрал ийм болсон” гэж их хэлдэг. Иймэрхүү үгсээс болж тэмцэж байгаа хүн улам шантарч, эргээд хамааралтай болсон ямар нэг донтолтоо улам хийх сэдэл төрдөг гэж тусламж зөвлөгөө авдаг хүмүүс хэлж байсан.  Хамааралтай болсон хүн үргэлж дотроо өөрийн донтолттой тэмцэж байдаг. Тиймээс ар гэрийн дэмжлэг маш чухал. Хэн нэгнийг донтолтоос авармаар байвал та өөрийн сэтгэл санаагаа эхлээд тогтворжуул. Донтолттой хүмүүс “Ар гэрийнхэн минь намайг ойлгодоггүй” гэж их ярьдаг. Ойлгохгүй байна гэдэг чинь өөрөө асар их хоосрол байдаг. Тэр хоосролоо дүүргэхийн тулд нөгөө хүн чинь дахиад л тогломоор санагдана. Тиймээс живж байгаа хүнийг аврахын тулд та өөрөө хамт живж байж болохгүй шүү дээ. Юу гэсэн үг вэ гэхээр та өөрөө эрэг дээр зогсож, тогтвортой байснаар живж байгаа хүнд мод саваа өгч аварна гэсэн үг.

4. Донтолттой хүн бусад төрлийн гэмт хэрэгт холбогдох тохиолдол олон байдаг шүү дээ. Энэ талаар?

Зээл аваад өрөнд орсон хүмүүст өдөрт ойролцоогоор “өрөө төл, төлөхгүй бол цагдаад өгнө” гэсэн сүрдүүлсэн 10 дуудлага ирж байдаг. Тэгэхээр тухайн хүн маань дарамтад орж “ЯГ ОДОО МӨНГӨ ОЛОХ” аргыг бодож эхэлдэг. Тэр арга нь нөгөө л нэг тоглоомоо тоглох байдаг. Тоглохын тулд гарааны мөнгө хэрэгтэй, тэрийг яаж олох вэ гэсэн байнгын дарамтын улмаас тухайн гэмт хэргийн сэдэл төрдөг. Манай төв дээр донтолттой хүмүүсийн ихэнх нь “Би тухайн үед хүнээс мөнгө авч байхдаа хууръя, залилъя гэж хэзээ ч бодож байгаагүй” гэж хэлдэг. Гэхдээ энэ нь даамжирсаар байгаад гэмт хэрэг өөрийн мэдэлгүй хийхэд хүргэдэг юм. 

5.Донтолтоос яаж гарах вэ?

Донтолтод хэд хэдэн үе шат байдаг.

• Эрсдэлгүй тоглох буюу зугаацахын тулд багахан хэмжээний мөнгөөр сардаа 1, 2 тоглодог хүмүүс
• Эрсдэлтэй тоглох буюу тоглох мөнгөн дүнгээ ихэсгэх, мөн тоглох хугацаа нь 14 хоногтоо 1, 2 удаа болж ихсэж байдаг.
• Асуудалтай тоглох буюу  архаг гэмт хэрэг хийж мөнгө олж, түүгээрээ тоглох. Мөн гэрийнхнээсээ нууцаар мөнгө авч тоглох зэрэг

Ер нь эргэн тойрны өөр тоглодог хүмүүс маш их нөлөөлж байдаг. Тухайн хүмүүс хэр их алдсанаа хэзээ ч ярихгүй,  үргэлж хожсоноо ярьж байдаг. Тиймээс сонссон хүмүүс өөрийн эрхгүй тоглож үзмээр санагдаж, донтолтын үе шат эхэлдэг болохоор эргэн тойрноо сайн анзаарч байгаарай.

Таны амьдрал бол үнэ цэнтэй шүү. Өөртэйгөө тэмцэх тэмцлээ битгий зогсоо. Ганцаараа битгий шанал. Манай сургалтын төв дээр танд хэрэгтэй олон сургалт мөн таны зовлонг ойлгох хүмүүс хоорондоо ярилцаж байдаг. Мэргэжлийн хүнд хандаарай. Хүн гадуур явж байхдаа бүдэрч уналаа гээд тэндээ тэр чигтээ үргэлжлүүлж амьдардаггүй, босоод явдагтай ижил та ч бас чадна.