Starship бол SpaceX компанийн бүтээж буй, хүн болон ачаа тээвэрлэх зориулалттай дэлхийн хамгийн том, хамгийн хүчтэй сансрын пуужинг бий болгох систем, төсөл юм. Энэ нь үндсэндээ хоёр хэсгээс бүрддэг:

1. Super Heavy (хүч нэмэгдүүлэгч буюу түлхэгч) – Пуужингийн доод хэсэг бөгөөд асар том хүчтэй хөдөлгүүрүүдээр тоноглогдсон. Энэ хэсэг нь дэлхийгээс хөөрөх эхний шатанд бүх пуужинг дээш түлхэх үүрэгтэй. Түлш нь дуусах үедээ салж, буцаж дэлхий дээр газардаж дахин ашиглагдах зориулалттай.

2. Starship (хөлгийн бие) – Дээд хэсэгт байрлах хөлөг. Хүнтэй эсвэл ачаатай сансарт хөөрч, сар, Ангараг гариг руу нисэхээр төлөвлөгдсөн. Мөн дэлхий дээр дахин буух, дахин ашиглах зориулалттай.

Starship-ийн онцлог:

• 100% дахин ашиглагддаг систем.
• 150 тонныг дэлхийн тойрог замд гаргах хүчин чадалтай.
• Хамгийн хүчтэй хөдөлгүүртэй (Raptor хөдөлгүүрүүд). Super Heavy дээр 33 ширхэг, Starship дээр 6 ширхэг байдаг.
• Хүмүүсийг сар, Ангараг, цаашлаад нарны аймгийн бусад хэсэг рүү нисгэх зорилготой.
• Дэлхийн аль ч цэг хооронд бараг нэг цаг хүрэхгүй хугацаанд зорчих тээврийн хэрэгсэл болгохоор төлөвлөж байгаа.

Ирээдүйд:

• NASA Starship-ийг Artemis хөтөлбөртөө ашиглахаар сонгосон. 2026 оноос сар руу хүн тээвэрлэх зорилгоор ашиглана.
• Цаашдаа Ангараг гариг дээр суурин байгуулах хамгийн гол хэрэгсэл гэж тооцогдож байна.

Одоогийн байдал:

Одоогоор хэд хэдэн туршилтын нислэг хийсэн, гэхдээ ихэнх нь амжилтгүй болж, дэлбэрэлтээр дуусаж байгаа ба 3 сарын 6-ны орой найм дахь Starship пуужингийн туршилтын нислэгийг хөөргөж, тэр нь бүтэлгүйтэж осолджээ.

SpaceX осолдсон пуужингийн хүч нэмэгдүүлэгч буюу түлхэгчийг хөөрөлтийн цамхгаас амжилттай барьж авсан ч, бусад хөлгийн эд ангиуд замдаа сүйрч шатсан учир агаарын хөдөлгөөнд саад учруулж, Флоридагийн хамгийн том нисэх буудлуудаас зарим нислэг түр хугацаанд зогсжээ. АНУ-ын Холбооны Нисэхийн Захиргаанаас (FAA) гаргасан агаарын хязгаарлалтыг удалгүй цуцалсан ч нислэгүүдийн хоцролт үргэлжилсээр байна.