Одоогийн Пап лам бол Францис (Pope Francis) юм. Тэрээр 2013 оны 3-р сарын 13-нд Ромын Католик Сүмийн тэргүүн буюу Пап лам болж сонгогдсон ажээ. Жинхэнэ нэр нь Хорхе Марио Бергольо (Jorge Mario Bergoglio) юм. Тэрээр Аргентин улсад төрсөн анхны Пап лам бөгөөд өдгөө 88 насыг үзэж байгаа хүн юм.

Францис Пап лам нь шударга ёс, ядуурал, цагаачлал, байгаль орчны хамгаалал зэрэг сэдвүүдэд онцгой анхаарч, сүмийг илүү нээлттэй, хүнлэг болгохыг зорьсоор ирсэн. Тэрээр энгийн даруу амьдралын хэв маягаараа олонд танигдсан хүн билээ.

Пап лам Францис нь сүүлийн жилүүдэд эрүүл мэндийн олон асуудалтай тулгарч байгаа аж. Тэрээр залуудаа уушгины дээд дэлбэнгээ авхуулж байсан бөгөөд энэ нь түүний амьсгалын тогтолцоонд нөлөөлж, халдвар авах эрсдэлийг нэмэгдүүлдэг байна.

Түүний биеийн байдал 2025 оны 2-р сарын эхээр муудаж, бронхит туссан гэж оношилжээ. Гэвч 2-р сарын 9-ний өдөр түүний биеийн байдал хүндрэн Ромын Гемелли эмнэлэгт хүргэгдсэн байна. Шинжилгээгээр олон төрлийн вирус, бактерийн халдвар буюу полимикробын амьсгалын замын халдвар туссан болох нь тогтоогдсон. Улмаар 2-р сарын 13-нд хийгдсэн компьютер томограф (CT) шинжилгээгээр хоёр уушгинд нь хатгалгаа үүссэн нь батлагджээ.

Бронхит гэдэг нь уушгины гуурсан хоолойн (бронх)-ны салст бүрхэвч үрэвсэх өвчин юм. Энэ нь амьсгалын замыг нарийсгаж, ханиалгах, цэртэй болох, амьсгал давчдах, цээжээр өвдөх зэрэг шинж тэмдэг үүсгэдэг.

Полимикробын амьсгалын замын халдвар гэдэг нь амьсгалын замд нэгээс олон төрлийн бичил биетэн (вирус, бактери, мөөгөнцөр гэх мэт) зэрэг халдварласан гэсэн үг юм.

Одоогоор Пап лам Францис нь кортизон болон антибиотик эмчилгээ хийлгэж байгаа бөгөөд нэмэлт хүчилтөрөгч хэрэглэх шаардлагагүй, биеийн байдал нь тогтвортой байна гэж Ватиканаас мэдээлжээ.

Ватикан (Vatican City) нь Дэлхийн хамгийн жижиг улс бөгөөд Ромын Католик сүмийн төв юм. Энэ улс нь Италийн Ром хотод байрладаг бөгөөд Пап ламын өргөө, засаг захиргааны төв.