Ерөнхийлөгч Юн Сүк Ёл онц байдлын дэглэм зарласантай холбоотойгоор Өндөр албан тушаалтнуудын холбогдсон авлигын хэргийг мөрдөх газар Юн Сүк Ёлыг бослого үймээнд турхирсан хэргээр шалгаж эхэлсэн юм.

Парламентын шийдвэрийн дагуу албан үүргээсээ чөлөөлөгдсөн Ерөнхийлөгч Юн Сүк Ёл хууль сахиулагчтай хамтран ажиллаж, байцаалт мэдүүлэг өгөхөөс татгалзан, ерөнхийлөгчийн өргөөндөө бүгсэн юм. Үүнтэй холбоотойгоор энэ сарын эхээр шүүхээс түүнийг баривчлах захирамж гаргаж, мөрдөгчид ерөнхийлөгч Юн Сүк Ёлыг баривчлахаар өргөөнд нь очсон ч ерөнхийлөгчийн аюулгүй байдлын албан хаагчдын эсэргүүцэлтэй тулгаран түүнийг баривчилж чадаагүй билээ.

Тэгвэл өнөө өглөө Өндөр албан тушаалтнуудын холбогдсон авлигын хэргийг мөрдөх газрын мөрдөгчид Ерөнхийлөгч Юн Сүк Ёлыг баривчилжээ. Ингэснээр Юн Сүк Ёл БНСУ-ын түүхэнд ерөнхийлөгчийн албан тушаалыг хашиж байхдаа баривчлагдсан анхны ерөнхийлөгч болж байна.

Мөрдөгчид ерөнхийлөгчийн өргөө рүү орохтой зэрэгцэн ерөнхийлөгчийн өргөөний гадна түүнийг дэмжигчид болон эсэргүүцэгчид цуглажээ. Юн Сүк Ёлыг дэмжигчид түүнийг баривчлахыг оролдож буйг эсэргүүцэн зарим нь цагдаа нарын эсрэг хүч хэрэглэжээ.

Эх сурвалж: BBC