Ойрын өдрүүдэд цаг агаар огцом өөрчлөгдөж, зам орчны нөхцөл байдал хүндрэх төлөвтэй байгаа тул холын замд гарах гэж буй иргэд, жолооч нарт цагдаагийн байгууллагаас онцгойлон анхааруулж байна.

Тавдугаар сар гарсан хэдий ч байгаль дэлхий аашаа хувиргаж, ойрын гурван хоногт дараах бүс нутгуудаар цас, бороо хослон орохоор байна.

• Өнөөдөр /2026.05.20/: Нутгийн баруун хагаст бороо, нойтон цас орно.

• Маргааш /2026.05.21/: Нутгийн төв хэсгээр цаг агаарын тогтворгүй байдал шилжинэ.

• Нөгөөдөр /2026.05.22/: Нутгийн зүүн хэсгээр бороо, нойтон цас орж, зөөлөн цасан шуурга шуурах төлөвтэй.

Нойтон цас орсны улмаас замд хальтиргаа гулгаа үүсэж, үзэгдэх орчин хязгаарлагдах өндөр эрсдэлтэй тул дараах зүйлсийг чанд мөрдөхийг зөвлөж байна.

• Тээврийн хэрэгслийн бүрэн бүтэн байдал: Холын замд гарахаасаа өмнө машины цахилгаан систем, шил арчигч, гэрэл тусгал болон тормосны системийг заавал шалгаарай.

• Хурдаа тохируулах: Гулгаатай замд огцом тормос гишгэхээс зайлсхийж, урд яваа машинаасаа аюулгүй зайг барьж, хурдаа тохируулан хөдөлгөөнд оролцоорой.

• Мэдээлэлтэй байх: Замд гарахаасаа өмнө болон явж байхдаа цаг агаарын урьдчилсан мэдээг тогтмол сонсож, нөхцөл байдал хүндэрвэл ойролцоо суурин газарт түр саатах.