АНУ-ын Ерөнхийлөгч Доналд Трамп мягмар гарагт АНУ-ын иргэн болох шинэ замыг нээх “алтан карт” гэх визийг танилцууллаа. Энэ виз 5 сая ам.долларын хөрөнгө оруулалтын нөхцөлтэй бөгөөд олон жил ашиглагдсан EB-5 хөрөнгө оруулагчийн визийг орлох юм.

ДОНАЛД ТРАМП: “Энэ визийг авах хүмүүс АНУ-д их хэмжээний мөнгө зарцуулж, их хэмжээний татвар төлж, олон хүнийг ажлын байраар хангах шаардлагатай учир тэр хүмүүс баян чинээлэг, амжилттай хүмүүс байх ёстой.” 

EB-5 виз нь 1990 онд Конгрессоор батлагдсан бөгөөд дор хаяж АНУ-д 10 ажлын байр бий болгохуйц 1 сая орчим ам.долларын хөрөнгө оруулалт хийсэн хүмүүст олгодог оршин суух эрхтэй виз байжээ.

АНУ-ын Худалдааны сайд Ховард Лутник уг “Trump Gold Card” нь 35 жилийн настай EB-5 хөтөлбөрийг хоёр долоо хоногийн дотор бүрэн орлож чадна гэдгийг баталжээ.