Бид өдөр тутамдаа идэж байгаа чихрийн цаас, хоолны үлдэгдэл зэрэг маш их хог хаягдал үүсгэдэг билээ. Тэгвэл дэлхий даяар үүсэж байгаа энэ хог хаягдлууд нь хүн төрөлхтний нүүр тулж байгаа хамгийн том асуудлуудын нэг билээ. Энэ нь дэлхийн дулаарал, уур амьгалын өөрчлөлт, усны бохирдол, усны хомсдол, өвчин зовлон, агаарын бохирдол гээд дэлхий даяар тулгамдаад байгаа олон асуудлуудын шалтгаануудын нэг билээ.

Дэлхий даяар жилд 2.1 тэрбум тонн үйлдвэрлэгдэж, үүнээс ердөө 16% буюу ойролцоогоор 340 тонныг л дахин боловсруулж чаддаг гэнэ. Харин далайд хаягддаг хуванцар хогны хэмжээ жилд 8-10 сая тонн байдаг ба 2050 он гэхэд далайд загаснаас их хог хуванцар хаягдалтай болох магадлалтай гэж судлаачид үзэж байгаа аж.

Улс орнуудын жилд үйлдвэрлэгддэг хог хаягдлаас сонирхуулбал:

• АНУ - Нэг хүнд ноогдох хамгийн их хог үйлдвэрлэдэг улс (жилд 800 кг орчим)
• Хятад - Хамгийн их хуванцар хог хаягдал гаргадаг улс (жилд 60 сая тонн) болжээ.

Хог хаягдлын асуудал дээр хамгийн сайн ажиллаж байгаа улсуудаас дурдвал:

Швед улс нийт хог хаягдлынхаа 99%-г дахин боловсруулж, аль эсвэл эрчим хүч болгон ашигладаг. Тэгвэл Европын холбооны улсууд хог хаягдлынхаа 45%-г дахин боловсруулдаг. Харин АНУ 35%-г дахин боловсруулж чаддаг бол дэлхийн бусад орнуудын дундаж 16% байна.

Хог хаягдлын хор уршиг:

• Хогийн цэгээс ялгардаг метан хий нь дэлхийн дулааралд ихээхэн нөлөөлдөг.
• Хуванцар хог хаягдал далайн амьтдад ноцтой аюул учруулж, жил бүр 1 сая орчим шувуу, 100,000 далайн хөхтөн амьтад үхдэг.
• Дэлхийн нийт хог хаягдлын 40% нь зохих ёсоор устгагддаггүй буюу шатаагдаж, эсвэл байгальд хаягддаг.