2025 оны 4-р сарын 7-ны өдөр Хятадын хөрөнгийн зах зээл 2008 оны санхүүгийн хямралаас хойших хамгийн огцом нэг өдрийн уналттай тууллаа. Хонконгийн "Hang Seng" индекс 10 гаруй хувиар унаж, сүүлийн 17 жилийн хамгийн том бууралт нь байсан бол эх газрын Хятадын CSI 300 индекс 5 хувиас дээш уналттай байв.

Энэ огцом уналтын гол шалтгаан нь АНУ болон Хятадын хоорондын гаалийн тарифын хурцадмал байдал бөгөөд хоёр улс харилцан бараа бүтээгдэхүүндээ өндөр тариф оноосон нь хүчтэй сөрөг нөлөө үзүүллээ.

Хямрал нь зөвхөн индексүүдэд бус, "HSBC", "Standard Chartered" зэрэг томоохон санхүүгийн байгууллагуудын хувьцаанд ч хүчтэй цохилт өгсөн бөгөөд эдгээр компаниудын хувьцааны үнэ 15% хүртэл унасан байна. Мөн Хятадын юань валютын ханш 2025 оны 1-р сараас хойших хамгийн доод түвшинд хүрч суларлаа. Хөрөнгө оруулагчид АНУ-Хятад хоорондын худалдааны дайнаас болж дэлхийн эдийн засаг хямралд орох эрсдэлд санаа зовниж, технологи, банк санхүү, жижиглэн худалдаа зэрэг олон салбарын хувьцаануудыг бөөнөөр нь зарж эхэлсэн байна.