Samsung Electronics компанийн хамтран гүйцэтгэх захирал (CO-CEO) Han Jong-Hee зүрхний шигдээсний улмаас өнөөдөр буюу 3 сарын 25-ний өдөр 63 насандаа нас барсан гэж тус компанийн төлөөлөгч мэдээллээ. 

1962 онд төрсөн Han Jong-Hee нь 2022 оноос хойш Samsung-ийн хэрэглэгчийн электрон бараа болон гар утасны салбарыг удирдаж байжээ. Тэрээр мөн 2022 онд дэд дарга болон хамтран гүйцэтгэх захирлаар томилогдсон байна. Түүний хамтран захирал Jun Young-Hyun нь тус компанийн хагас дамжуулагчийн бизнесийг толгойлдог.

Samsung компани Han Jong-Hee-г 37 жилийн турш Samsung-ийн ТВ бизнесийг дэлхийд тэргүүлэх түвшинд хүргэхэд амьдралаа зориулсан хэмээн дурдсан байна. Түүнчлэн цахилгаан хэрэгсэл, ахуйн барааны салбарыг удирдахдаа бизнесийн хүндхэн нөхцөл байдал дунд компанийн өсөлтөд ихээхэн хувь нэмэр оруулсныг онцолжээ.

“Бид түүний гэр бүл, ойр дотнынхонд нь гүн эмгэнэл илэрхийлье” гэж тус компанийн мэдэгдэлд дурджээ.

Samsung-ийн зүгээс Han Jong-Hee-гийн залгамжлагчийн талаар албан ёсны мэдээлэл хараахан хийгдээгүй байна.

Сүүлийн жилүүдэд тус компани санхүүгийн томоохон сорилтуудтай нүүр тулгарч буй. Ялангуяа, хагас дамжуулагчийн салбарт Тайванийн TSMC компанитай өрсөлдөхөд хүндрэлтэй байгаа бөгөөд дэвшилтэт чип үйлдвэрлэл, томоохон харилцагч татах тал дээр хоцорч явааг шинжээчид онцолжээ.