Эрдэмтэд хавдар судлалд томоохон дэвшил гаргаж, хавдрын эсийг эрүүл, хэвийн эс болгон дахин програмчлах аргыг нээн илрүүллээ. Энэ арга нь өвчний явцыг үр дүнтэй зогсоож, хавдрын тархалтыг сааруулах боломжтой юм.

БНСУ-ын Шинжлэх Ухаан, Технологийн Дээд Институтийн (KAIST) судлаачид хорт хавдрын эсийг хэвийн эс болгон буцааж шилжүүлж чаддаг молекулыг олсон байна. Энэхүү шинэ арга нь уламжлалт хорт хавдрын эмчилгээ шиг эсийг устгах бус, түүнийг хэвийн төлөвт оруулахыг зорьж байгаа нь эмчилгээний сөрөг нөлөөг бууруулах давуу талтай.

Мөн St. Jude Хүүхдийн Судалгааны Эмнэлгийн эрдэмтэд энэхүү аргыг ашиглан рhabdoid нэртэй хорт хавдрын эсийг буцаан хувиргах туршилтыг амжилттай хийжээ. Тэд хавдрын эсийн DCAF5 хэмээх амьдрах чадварыг хангагч уургийг онилж, түүнийг дарангуйлахад хавдрын эсүүд мутацлагдсан онцлогоо алдаж, хэвийн эс мэт үйл ажиллагаа явуулж эхэлсэн байна.

Энэхүү судалгааны үр дүн нь хавдрын эмчилгээний ирээдүйг эрс өөрчилж, эс устгах бус хэвийн төлөвт оруулах зарчимд тулгуурласан шинэ эмчилгээний чиг хандлагыг бий болгож магадгүй болоод байна. Гэхдээ энэ аргыг клиник хэрэглээнд нэвтрүүлэхийн тулд цаашид илүү олон судалгаа, туршилт хэрэгтэй юм.