“Оранж” энтертайнмент “Мобинет” ХХК-тай хамтран “Voo Original series болох Монголын анхны түүхэн, детектив төрлийн “Мөрч” олон ангит уран сайхны киног бүтээн энэ сарын 13-ний өдрөөс эхлэн үзэгчдийн хүртээл болгоод буй. Тус кино нь Монгол Улс, Манж Чин гүрний дагаар улс байх үе буюу 19-р зууны сүүл үед өрнөх үйл явдал, нууцлаг гэмт хэргийн мөрдлөгийн тухай өгүүлэх аж.  

-1921 оны хувьсгалаас өмнөх үеийн алдартай хүмүүсийн тухай дүрслэхдээ ихэвчлэн ямар нэг мяндаг тушаалтан, эрдэм шидтэй лам  хувраг, үзмэрч, шилийн сайн эрчүүдийг онцолдог бол “Мөрч” олон ангит киноны хувьд энгийн малчин хүмүүсийн дотор аливааг гүн гүнзгий харж чаддаг, даруу, төлөв, жинхэнэ сэтгэдэг хүмүүс бас байсан гэдгийг харуулснаараа онцлог гэж кино багийнхан хэлж байна.

 Тус киноны гол дүр болох Монгол “Шерлок Холмс”  мөрчийн дүрд СТА жүжигчин Н.Ялалт тоглосон бол бусад гол дүрүүдэд СТА жүжигчин О.Оюун, Б.Батмэнд, Д.Бэхбилэг, Л.Энхбаяр залуу жүжигчид болох Х.Сумъяадорж, Ч.Цэнгүүн, Ц.Мөнхболд, Л.Жижжалам, Э.Төгсжаргал нар тогложээ. 

Харин хатны дүрд “Тэнгисийн эрэг 247” шоунд оролцох үедээ Монгол хатны дүрд тоглох болно хэмээн амлаж байсан тус шоуны оролцогч, жүжигчин Б.Энхзаяа тогложээ. 

Арын албанд нийт 200 гаруй уран бүтээлч ажилласан бөгөөд зөвхөн зураачийн багт 20 гаруй уран бүтээлч хүчин зүтгэж, 100 гаруй хоног тасралтгүй зураг авалт хийсэн байна. Мөрч киноны найруулагчаар “95%”, “Тойрог”, “Төрийн дайсан” зэрэг детектив киногоороо танигдсан Б.Дэлгэрбаяр ажилласан бол продюсероор “Шар гэгээ, “Нийслэл Хүүхэн” зэрэг 20-иод уран бүтээл дээр ажилласан Ү.Баяржаргал нар ажиллажээ.  

19-р зууны сүүл үеийн нэгэн нууцлаг гэмт хэргийн мөрдлөгийн түүхийг үзэгч та бүхэн “+18” ангилалтай хэсгийг “VOO Original”-аас, харин ТВ хувилбарыг 03-р сарын 23 буюу энэ бүтэн сайн өдөр NTV телевизээр хүлээн авч үзээрэй.