Трампын засаг захиргаа Колумбийн их сургуулийн идэвхтэн оюутан Махмуд Халилыг АНУ-аас албадан гаргахаар зэхэж байгаа аж. Гэхдээ засгийн газар үүнийг зөвтгөх ганцхан шалтгаан дурдсан нь төрийн нарийн бичгийн дарга Марко Рубио Халилын АНУ-д оршин суух нь “гадаад бодлогод ноцтой сөрөг үр дагавар” авчирч болзошгүй гэж үзсэн.

Халилын холбооны цагаачлалын шүүхэд дуудагдсан баримт бичигт үүнээс өөр тодорхой нотолгоо эсвэл буруутгал байхгүй. Бямба гарагт баривчлагдсанаас хойш дөрөв хоногийн дараа болсон шүүх хуралдаанаар ч шинэ мэдээлэл гараагүй байна.

Халилын өмгөөлөгчид шүүгчээс түүнийг түр суллах эсвэл Нью-Йорк руу буцаах хүсэлт гаргажээ. Тэрээр Нью-Йоркт байхдаа цагаачлалын албаны ажилтнуудад баривчлагдаж, 1,300 милийн зайтай Луизиана мужийн саатуулах төв рүү шилжүүлэгдсэн байна.

Ерөнхийлөгч Доналд Трамп АНУ-д сурч буй гадаадын оюутнуудын дунд “террорист үйл ажиллагааг дэмжсэн, еврейчүүдийн эсрэг, Америкын эсрэг” жагсаалд оролцсон хүмүүсийг албадан гаргана гэж мэдэгдээд байгаа. Харин Халилыг дэмжигчид болон бусад шүүмжлэгчид Трампын засаг захиргаа Үндсэн хуулийн Нэгдүгээр нэмэлт өөрчлөлтөөр баталгаажсан үг хэлэх эрх чөлөөг зөрчиж байна гэж үзэж жагсаж байна.