Өдрөөс өдөрт "AI" өргөжин нэг л мэдэхэд зураг янзалдаг болжээ. Тэгвэл "Studio Ghibli"-гийн хийцийг дуурайж, өөрсдийн зургаа AI-аар янзлуулдаг хүмүүс ихэссэнтэй холбоотойгоор тус студийн захирал Хаяао Мияазакийн нэгэн ярилцлага алдартай болоод байгаа юм.

Хаяао Мияазаки "AI"-аар бүтээсэн урлагийг таашаадаггүй гэдгээ олон жилийн өмнөөс илэрхийлсээр  иржээ. Тэрээр 2016 онд "NHK"-ийн баримтат нэвтрүүлэгт оролцохдоо хиймэл оюун ухаанаар бүтээгдсэн нэгэн анимацийн демо хувилбарыг үзээд маш их дургүйцсэн байдаг. 

Хаяао Мияазаки: AI бол амьдралын доромжлол

Тэрээр үргэлж гар аргаар зурсан, хүн бүрийн сэтгэлээс урган гарсан, сэтгэл хөдлөл, амьд мэдрэмжийг шингээсэн уран бүтээлүүдийг эрхэмлэж ирсэн хүн билээ. Тиймээс машинд суурилсан, тооцооллоор бүтсэн анимаци, урлагийг амьд мэдрэмжгүй, хиймэл зүйл гэж үздэг аж.

Энэ нь зөвхөн түүний хувийн үзэл бодол ч биш. Урлагийн ертөнцөд олон хүн "AI"-аар бүтээгдсэн контентыг хэтэрхий механик, бодит сэтгэл хөдлөлийг илэрхийлж чадахгүй гэж шүүмжилдэг. Харин зарим нь AI-ийг хэрэгтэй хэрэгсэл гэж үзэж, урлагийг хөгжүүлэх шинэ боломж хэмээн хүлээн зөвшөөрч байна.