Токио хотын “Саникүкай эмнэлэг” анх удаа “Baby box” буюу нярай хүүхдийг аюулгүй, нууцаар орхих боломжтой үйлчилгээ нэвтрүүллээ. Энэхүү “бэби бокс”-г 24 цагийн турш ажиллуулахаар болсон гэнэ.

“Саникүкай эмнэлг”-ийн тэргүүн Хитоши Катогийн хэлснээр, зарим эцэг эхчүүд хүүхдээ орхихоос өөр аргагүй байдалд ордог тул энэ нь “хамгийн сүүлчийн авралын сонголт” болох юм гэж үзжээ. 

Нярайг тусгай сагсанд байрлуулахад мэдрэгч ажиллаж, эмнэлгийн ажилтнууд хүүхдийг шууд хүлээн авч, халамжлах арга хэмжээ авах юм.

Японд энэ үйлчилгээ анх 2007 онд Кумамото мужийн Жикэй эмнэлэгт нэвтэрч, өдгөө 179 хүүхэд хүлээн авч, халамжилсан байна. 

“Саникүкай эмнэлэг” мөн “нууц төрөлт” хөтөлбөр хэрэгжүүлж эхэлсэн нь хүнд нөхцөлд байгаа эхчүүдийг эмнэлгийн хяналт дор, аюулгүй төрөх боломжийг олгох зорилготой гэнэ. 

Гэвч зарим хүмүүс энэ үйлчилгээг хүүхдийг эцэг эхээ мэдэх эрхийг хязгаарлах эрсдэлтэй гэж үзэн эсэргүйцэж байгаа гэнэ. Гэсэн хэдий ч олон нийт хүүхдийг аюулгүй байлгах энэхүү арга хэмжээг дэмжиж, эерэгээр хүлээн авч байна гэнэ.