2023 онд Хан-Уул дүүргийн прокурорын газраас тус дүүргийн Нийгмийн даатгалын хэлтэстэй хамтарч нийгмийн даатгалын шимтгэлийн тооцоо хийдэггүй, шимтгэлийн өр үүсгэн ажил олгогчийн судалгааг гаргаж, шүүхэд нэхэмжлэл гаргаж ажлыг эхлүүлсэн байна. 

Дээрх хамтран ажиллах ажлын хүрээнд Нийгмийн даатгалын хэлтсээс 2021 оноос хойш нийгмийн даатгалын шимтгэлийн төлөлтөө төлөхгүй байгаа аж ахуйн нэгжүүдэд холбогдуулан нэхэмжлэл бичиж, прокуророос төрийг төлөөлөн гуравдагч этгээдээр оролцож 10 орчим хэргийг шүүхээр шийдвэрлүүлжээ.Тухайлбал:  “Бүрдэл майнинг“ ХХХК-аас 25.417.887.657.6 төгрөгийг гаргуулахаар Сүхбаатар дүүргийн Иргэний хэргийн анхан шатны шүүхэд нэхэмжлэл гаргасан байна.

Монгол Улсын Дээд шүүхийн Хяналтын шатны Иргэний хэргийн шүүх хуралдааны 2025 оны 2 дугаар сарын 11-ний өдрийн 001/ХТ2025/00036 дугаартай тогтоолоор Нийслэлийн Иргэний хэргийн давж заалдах шатны шүүхийн 2024 оны 12 дугаар сарын 06-ны өдрийн 210/МА2024/02114 дүгээр магадлалыг хүчингүй болгож, Сүхбаатар дүүргийн Иргэний хэргийн анхан шатны шүүхийн 2024 оны 09 дүгээр сарын 18-ны өдрийн 181/ШШ2024/03417 дугаар шийдвэрийн тогтоох хэсгийн 1 дэх заалтыг "Нийгмийн даатгалын тухай /1994 он/ хуулийн 17 дугаар зүйлийн 1-ийн 1, 1-ийн 4, Иргэний хуулийн 232 дугаар зүйлийн 232.6-д заасныг баримтлан хариуцагч "Бүрдэл майнинг" ХХК-аас 25,417,887,657 /хорин таван тэрбум дөрвөн зуун арван долоон сая найман зуун наян долоон мянга зургаан зуун тавин долоон/ төгрөгийг гаргуулж нэхэмжлэгч Хан-Уул дүүргийн нийгмийн даатгалын хэлтэст олгож, 795,034,476 төгрөгт холбогдох хэсгийг хэрэгсэхгүй болгосугай." гэж өөрчлөн, шийдвэрийн бусад заалтыг хэвээр үлдээж, нэхэмжлэгчийн болон гуравдагч этгээдийн итгэмжлэгдсэн төлөөлөгч нарын гомдлыг хангаж шийдвэрлэжээ.