Эргээс ус, магнийн исэл хольсон хольцыг хоолойгоор дамжуулан далайд цутгаж эхэлсэн байна. Энэхүү нунтаг цагаан эрдэс нь барилга байгууламжаас эхлээд ходоодны хүчил дарах эмд хүртэл өргөн хэрэглэгддэг бөгөөд Канадын Нова Скотиа мужид төвтэй "Planetary Technologies" компани уг бодисыг ашиглан уур амьсгалын өөрчлөлтийг бууруулахын тулд далайд хүлэмжийн хийг шингээх боломжтой гэж үзэж байна.

“Уур амьсгалыг сэргээнэ. Далайг эдгээнэ.” гэх урианы дор уг ажил явагдаж байгаа аж.

Planetary бол далайн шингээх чадварыг ашиглан дэлхийн дулаарлын эсрэг шинжлэх ухаанч шийдэл боловсруулж буй өсөн дэвжиж буй салбарын нэг хэсэг юм. Тус компани Элон Маскийн сангаас 1 сая ам.долларын хөрөнгө оруулалт авсан бөгөөд цаашид 50 сая ам.долларын шагналын төлөө өрсөлдөж байна.

Далайд чулуу, шим тэжээл, ургамлын хаягдал эсвэл далайн замаг “живүүлэх” замаар нүүрстөрөгчийн давхар ислийг хэдэн зуун жил, бүр түүнээс ч удаан хугацаанд хадгалах боломжтой гэсэн таамгийг дэвшүүлж буй олон компани, судалгааны багууд бий. Сүүлийн дөрвөн жилийн хугацаанд ойролцоогоор 50 туршилтын судалгаа хийгдэж, гарааны компаниуд хэдэн зуун сая ам.долларын хөрөнгө оруулалт татсан байна.