3 сарын 17-ноос 18-нд шилжих шөнө "Ноорог" -ийн хамт олон болох найман хүнийг Кибер гэмт хэрэгтэй тэмцэх газраас прокурорын зөвшөөрөлгүйгээр хойшлуулшгүй шалгах ажиллагаа хэмээн саатуулан байцааж, тэднийг “Эрүүгийн хуулийн 19.9.1 дүгээр заалт буюу үндэсний эв нэгдлийг бусниулах заалтаар шалгасан” хэмээн Ноорогийн үүсгэн байгуулагч О.Уламсайхан Кибер гэмт хэрэгтэй тэмцэх газрын гадаа хийсэн мэдээлэлдээ дурдсан юм.

Тэрээр "Ноорог" -ийн хамт олон байцаалтад орсон тухай мэдээлэл түгэхтэй зэрэгцээд тэднийг MCS компанитай хамааралтай хэмээж, тус компани тролл баг ажиллуулсан гэж мэдээлсэн Facebook дэх 21 хаяг, пэйж түгээснийг Монголын баримт шалгах төв / Mongolian Fact Checking Center - MFCC  шалгаж, тухайн хаягуудын нарийн мэдээллийг олонд түгээж харуулжээ. Уг хаягуудын талаар мэдэхийг хүсвэл энд  дарна уу. 

Монголын Баримт Шалгах Төв:  Ноорог студи аливаа тролл баг ажиллуулсан гэх баримт, нотолгоо байхгүй. 

Тодруулбал тус студийн өмгөөлөгч, Фиделитас Партнерс ХХН-ийн захирал Б.Наранцэцэг "Тодорхой зүйл байхгүй болохоор хэрэг, мөрдөн шалгах үйл ажиллагаатай холбоотой ярих зүйл байхгүй…” гэж мэдээлсэн ба ЦЕГ болон прокуророос  аль нь ч тэднийг тролл баг ажиллуулсныг нотлон тогтоосон тухай мэдээлэл хийгээгүй юм.