Америкийн 4 сая гаруй Z үеийнхэн (1997-2012 онд төрөгсөд) өнөөдөр ажилгүй байгаа нь залуусын бухимдлыг нэмэгдүүлж, их дээд сургуулийн үнэ цэний талаар эргэлзээ төрүүлж эхэлжээ.

Саяхан их, дээд сургуулиа төгссөн олон залуус сургуулиудаас хэт өндөр төлбөртэй боловч ажил олдоход тус болохуйц бодит ур чадвар эзэмшүүлээгүй гэж гомдоллож байна.

Оюутны зээлийн өр нэмэгдэж, автоматжуулалт хурдацтай хөгжиж, хөдөлмөрийн зах зээлд тавигдах шаардлага өөрчлөгдөж буй энэ үед зарим Gen Z залуус уламжлалт 4 жилийн сургалтаас илүүтэй мэргэжлийн сургалт, бие даасан хөдөлмөр эрхлэлт (фриланс) болон бизнес эрхлэх замыг сонгох болжээ. Ийнхүү их сургуулийн үнэлэмж, сургалтын төлбөрийн үр өгөөжийн талаарх маргаан улам хурцдаж байна.