Apple компани iPhone 17 Pro загварынхаа хэлбэр дизайныг шинэчилж байгаа талаар мэдээлэл гарч, технологийн ертөнцөд хүлээлт үүсгээд байна. 2025 оны 9-р сард нээлтээ хийхээр төлөвлөж буй энэхүү шинэ загвар нь өмнөх загваруудаас эрс ялгарахуйц өөрчлөлттэй ирэх төлөвтэй байна.

Analytics Insight-ийн мэдээлснээр, Apple-ийн шинэ iPhone 17 Pro загвар нь уламжлалт дөрвөлжин камерын байрлалын оронд хэвтээ урт камерын модультай болж өөрчлөгдөж байгаа аж. Энэхүү загвар нь Google-ийн Pixel цувралын гар утастай ижил төстэй харагдах аж. Харин стандарт iPhone 17 загвар нь уламжлалт дөрвөлжин камерын байрлалтай хэвээр байх төлөвтэй байна.

Мөн Apple компани iPhone 17 Air гэх шинэ загварыг танилцуулах магадлалтай бөгөөд энэ нь маш нимгэн, нэгэн жигд ганц камерын туузан загвартай байж магадгүй гэсэн цуу яриа гарчээ. Түүнчлэн, ар талаа хоёр өөр материалаар бүрэх (дээд хэсэг нь хөнгөн цагаан, доод хэсэг нь шил) боломжийг судалж байгаа бөгөөд энэ нь бат бөх чанар, утасгүй цэнэглэх технологийг сайжруулах зорилготой байж магадгүй.