Матча цайны хамгийн нөлөө бүхий үйлдвэрлэгч орон болох Япон улс өнгөрсөн жил дэлхий даяар матча цайны эрэлт урьд өмнө байгаагүйгээр ихэссэн нь тэдний цайны салбарт ихээхэн дарамт учруулсан бөгөөд энэ явдал дахин давтагдахаар төлөвтэй байна.

“Матча хомсдол” гэх яриа өнгөрсөн намраас эхлэн гарсан бөгөөд алдартай Киотогийн цайны компаниуд болох Ippodo, Marukyu Koyamaen нар анх удаа матча цайны нунтаг худалдан авах хязгаарлалт тогтоосноо зарласан юм. Хэрэглэгчид эдгээр компаниуд болон бусад үйлдвэрлэгчдийн Матча бүтээгдэхүүнүүдийг дэлгүүрүүдээс олоход бэрх болж, зарим нь бүрэн зарагдаж дууссан байжээ.

Хомсдолд орж, олдоц багассан бүтээгдэхүүнүүдийн ихэнх нь эхний ургалтаас гаргаж авсан матча (Camellia sinensis ургамлын эхний ургацаас гаргаж авсан цайны нунтаг) бөгөөд уг нь зөвхөн цайны ёслолд ашиглагддаг байсан ч сүүлийн үед олон улсын хэрэглэгчид өдөр тутамдаа хэрэглэхийг илүүд үзэх болсонтой холбоотой юм. Энэ төрлийн матча нь жилд ганцхан удаа хураагддаг тул хязгаарлагдмал байдаг. Гэсэн ч бусад төрлийн матча цайны эрэлт ч гэсэн эрчимтэй өссөөр байна.

Нара мужид байрладаг Kametani Tea компани Баруун Японы тариаланчдаас хоёр, гурав болон намрын ургацын тэнча (матча цайны нунтаг хийхэд ашигладаг нунтаглаагүй навч) худалдан авч, боловсруулан, дотоодын болон олон улсын ундаа үйлдвэрлэгчид, бөөний худалдаачдад нийлүүлдэг. Тус компанийн бизнесийн түншлэлийн менежер Жэйсон "Эрэлттэй хөл нийлүүлэхийн тулд одоо илүү цагаар, бүр амралтын өдрүүдээр ч ажиллаж байна” гэж хэлсэн байна.

2025 оны цайны ургац хураалт дөрөвдүгээр сараас эхлэх бөгөөд нийлүүлэлтийг сэргээж, түрхэн хугацаанд хангаж чадах боловч урт хугацааны шийдэл болохгүй юм. Японы хамгийн том цайны компани болох Ito En-ий Навч Брэндийн группийн захирал Фүми Үэкигийн хэлснээр, матча хэрэглээ, ялангуяа олон улсад, “өнгөрсөн жил түүхэн дээд хэмжээнд хүрсэн.”

Хэрэв хомсдол энэ чигээрээ үргэлжилбэл, Японы цайны салбар эрэлтэд нийцүүлэн, өөрчлөлт хийхээс өөр аргагүй болох юм.