Японы Ерөнхий сайд Шигэру Ишиба гуравдугаар сарын 27-ний өдөр АНУ-ын автомашины импортод 25%-ийн татвар ногдуулах шийдвэрийн эсрэг Токио “бүх боломжит арга хэмжээг авч үзнэ” гэж мэдэгджээ.

АНУ-ын Ерөнхийлөгч Доналд Трамп гуравдугаар сарын 26-нд гадаадаас оруулж буй автомашин, жижиг ачааны машины импортод 25%-ийн татвар ногдуулна гэж зарласан бөгөөд энэ шийдвэр нь түүний энэ жил Ерөнхийлөгчийн албан тушаалд дахин сонгогдсоноос хойш эхлүүлсэн дэлхийн худалдааны дайныг улам өргөжүүлж байна.

Япон улсын парламентын хуралдаан дээр Ерөнхий сайд Ишиба хэлэхдээ: “Япон бол АНУ-д хамгийн их хөрөнгө оруулалт хийдэг улс. Тиймээс Вашингтон бүх улсад ижил татвар ногдуулах нь үнэхээр зөв бодлого мөн үү гэдэгт бид эргэлзэж байна. Бид энэ байр сууриа илэрхийлсээр ч байх болно.” гэж онцолжээ.

Шинжээчдийн үзэж байгаагаар АНУ-ын шинэ татварын шийдвэр нь Японы эдийн засагт хүнд цохилт болох төлөвтэй байна. Учир нь Япон улс бол автомашины экспорттой улс даяараа салшгүй холбоотой юм.

Доналд Трампын шийдвэрээс хойш Японы автомашин үйлдвэрлэгчдийн хувьцааны үнэ өнөөдөр буюу гуравдугаар сарын 27-нд өглөөний арилжааны эхэнд огцом унажээ.

Сангийн яамны мэдээллээр 2024 онд Японы АНУ руу хийсэн нийт экспортын 28.3%-ийг автомашин эзэлж байсан нь бүх экспортын дундаас хамгийн өндөр үзүүлэлт болж байжээ.