2025 оны 6-р сарын 12, Ахмедабад, Энэтхэг — Өнөөдөр Энэтхэгийн “Эйр Индиа” компанийн Лондонгийн Гатвик нисэх буудал руу хөөрсөн тусгай нислэг осолдож, олон хүний амь нас, аюулгүй байдалд ноцтой аюул учрууллаа. Онгоцонд нийт 242 хүн (230 зорчигч, 12 багийн гишүүн) байжээ.

Осол хэрхэн болсон бэ?

AI171 дугаартай нислэг нь өглөөний 13:38 цагт (Орон нутгийн цагаар) Ахмедабад хотын Сардар Валлаббхай Пател олон улсын нисэх буудлаас хөөрсөн бөгөөд ердөө 5 минутын дараа ойролцоох Meghani Nagar дүүрэгт газар унасан байна. Онгоц нь Boeing 787-8 Dreamliner загвар бөгөөд өндөр технологи, урт зайн нислэгт зориулсан орчин үеийн онгоц юм.

Ослын үеийн байдал

Ослын дараа тэнгэрт хар утаа суунаглаж, оршин суугчид их хэмжээний дэлбэрэлтийн дуу сонссон тухай мэдээлжээ. Гал унтраах, түргэн тусламжийн багууд газар дээр нь очиж, гал түймрийг намжаах, амьд үлдсэн хүмүүсийг эрэн хайх ажиллагаа явуулж байна. Ослын бүс нь айлуудын орон сууцны хороололтой ойрхон байснаас шалтгаалан нэмэлт хохирол үүсэх эрсдэл өндөр байна.

Анхаарал татаж буй баримтууд

• Онгоцны нисгэгч багийн ахмад Сумит Сабхарвал 8,200 гаруй цагийн нислэгийн туршлагатай байсан бол туслах нисгэгч Клайв Кундар 1,100 цагийн туршлагатай байжээ.

• Хөөрснөөс хэдхэн минутын дараа нисэхийн хяналтад “MAYDAY” яаралтай дохио өгч амжсан байна.

• ADS-B дамжуулагчийн дохио тасарсан нь техникийн томоохон гэмтлийн ул мөр байж болзошгүйг харуулж байна.

• Онгоцонд 169 Энэтхэг, 53 Британи, 7 Португал, 1 Канад улсын иргэн зорчиж явжээ.

Хохирол

Одоогийн байдлаар албан ёсоор нас барагсдын тоог зарлагдаагүй байгаа боловч  зарим эх сурвалжуудын мэдээлснээр 189 хүн амиа алдаж, 30 гаруй хүн эмнэлэгт хүргэгдсэн байж болзошгүй байна. Гэвч эдгээр тоо нь баталгаажаагүй, албан ёсны мэдээллийг хүлээж буйг холбогдох байгууллагууд анхааруулж байна.

Шалтгааны талаар

Энэтхэгийн Агаарын тээврийн удирдах газар (DGCA) болон Ослын шалтгаан судлах газрууд ослын механик доголдол, хэт ачаалал, түлшний асуудал, эсвэл үйлдвэрлэлийн алдаа зэргийн аль нэгийг шалгаж эхэлсэн байна. Онгоц хөөрөхдөө их хэмжээний түлштэй, бүрэн ачаалалтай байсан нь нислэгийн хүнд нөхцлийг бүрдүүлсэн байж болзошгүй.

 Хариу арга хэмжээ

• Эйр Индиа компанийн зүгээс зорчигчдын гэр бүлүүдтэй холбогдох тусгай утасны шугам, сэтгэл зүйн тусламжийн төв ажиллуулж эхэлсэн.

• Ерөнхий сайд Нарендра Моди, Агаарын тээврийн сайд болон Дотоод хэргийн сайд нар ослын газар болон нөхцөл байдлыг онцгой анхааралдаа авсан.

• Boeing компанийн зүгээс хараахан албан ёсны мэдэгдэл хийгээгүй ч хувьцаа нь багагүй уналтад орж эхэлжээ.

Эх сурвалжууд: AP, Reuters, NDTV, IndiaTimes, Economic Times, News.com.au