Silent Hill "f" тоглоом 2025 оны 3-р сарын 14-нд дараачийн цувралынхаа трейлэрийг гаргасан байна. Гэвч одоогоор албан ёсны гарах огноо гараагүй байгаа аж. Энэхүү тоглоом нь 1960-аад оны Японд өрнөх бөгөөд гол дүрийн баатар Хинако Шимизүгийн түүхийг өгүүлнэ.  Тоглоомын зохиолыг алдартай Япон зохиолч Рюкүши07 бичсэн бөгөөд тоглогчдыг Ебисугаока хэмээх жижиг хотын аймшигт үйл явдлуудаар аялуулах юм. 

Уг цуврал нь айдас ба найдварын тухай өгүүлдэг. Тоглоомын ихэнх дүрүүд хувийн дотоод зөрчил, айдсаа даван туулахыг хичээдэг бөгөөд тэд үргэлж хар дарсан аймшигтай, аюултай нөхцөл байдалд ордог юм.

Цувралын гол онцлог нь сэтгэлзүйн айдсыг гүнзгий дүрсэлж, хүний ухамсар, харанхуй бодол, гэмшил, гэм бурууг судлах юм. Silent Hill-ийн ертөнц нь бодит болон хий үзэгдлийн хил хязгаарыг бүдгэрүүлж, тоглогчдыг сэтгэлзүйн гүн гүнзгий айдастай нүүр тулгадгаараа онцлог юм.

Тоглоомын олон дүрүүд өөрсдийн гэм буруугаа хүлээн зөвшөөрөх эсвэл зугтах сонголттой тулгардаг бөгөөд зарим нь гэрлийг олж, зарим нь бүр мөсөн харанхуйд уусдаг. Silent Hill нь зөвхөн аймшгийн тоглоом биш, харин хүний сэтгэлзүй, гүн гүнзгий айдас, найдварын тухай өгүүлдэг түүхүүдийг агуулдаг.

Мөн Silent Hill f нь Японд 18+ үнэлгээ авсан цувралын анхны тоглоом болж байна.  Өмнөх Silent Hill тоглоомууд Японд ихэвчлэн CERO:C (15+) үнэлгээтэй байсан бол,  Silent Hill f нь CERO:Z (18+) үнэлгээгээр үнэлэгдсэн байна.  Энэхүү үнэлгээ нь тоглоомын хүчирхийлэл, цус, хэсэгчилсэн нүцгэлэлт зэрэг агуулгатай холбоотой юм.