The Journal of Nutrition сэтгүүлд хэвлэгдсэн шинэ судалгаагаар өндөр настнуудын өндөгний хэрэглээ болон Альцгеймерийн өвчний хоорондын хамаарлыг судалжээ.

Судалгаанд дунджаар 81.4 настай 1,024 оролцогч хамрагдсан бөгөөд 6-7 жилийн турш тэднийг ажигласан байна. Энэ хугацаанд 280 хүн (27.3%) Альцгеймерийн деменци өвчтэй гэж оношлогджээ.

Долоо хоногт 1-с дээш удаа өндөг идэх нь Альцгеймерийн эрсдлийг 47%-иар бууруулдаг  болохыг тогтоосон. Энэ нь  өндөгний найрлага дахь "холин" гэх шим тэжээлтэй холбон тайлбарлажээ. "Холин" нь тархины эрүүл мэндэд чухал үүрэгтэй бөгөөд ой санамж, булчингийн үйл ажиллагаанд оролцдог нейротрансмиттерийн нийлэгжилтийг дэмждэг байна.

Нейротрансмиттер гэдэг нь тархи, мэдрэлийн эсүүдийн хооронд мэдээлэл дамжуулдаг химийн бодис юм.

Энэхүү судалгаа өндөгний хэрэглээ ахмад настнуудын когнитив эрүүл мэндийг дэмжих боломжтой гэсэн таамаглалыг дэвшүүлж байна. Гэхдээ энэ нь зөвхөн хамаарал тогтоосон судалгаа бөгөөд өндөгний хэрэглээ шууд Альцгеймерийн өвчнөөс сэргийлдэг эсэхийг тодорхойлоход нэмэлт судалгаа шаардлагатай юм.