Шведийн Засгийн газар сурагчдын унших, бичих чадвар сүүлийн жилүүдэд буурч байгаатай холбоотойгоор сургуулиудад цаасан ном, дэвтэр, үзэг ашиглахыг дэмжих бодлого хэрэгжүүлж эхэллээ. Гэвч энэхүү шийдвэрийг технологийн компаниуд, зарим багш болон компьютерын шинжлэх ухааны мэргэжилтнүүд шүүмжилж байна. Тэдний үзэж буйгаар дижитал хэрэглээг багасгах нь хүүхдүүдийг ирээдүйн хөдөлмөрийн зах зээлд бэлтгэхэд сөргөөр нөлөөлж, цаашлаад Шведийн эдийн засагт хор хохирол учруулж болзошгүй гэж сануулж байгаа юм.

Анги танхимд ном, дэвтэр зонхилж эхэллээ

Стокгольмын ойролцоох Накка хотын нэгэн ахлах сургуульд төгсөх ангийн сурагчид цүнхнээсээ зөөврийн компьютерээ гаргахын зэрэгцээ өмнөхөөсөө илүү их ном, дэвтэр авч явдаг болсон байна.

Шведийн сургуулиудад зөөврийн компьютерийг 2000-аад оны сүүл, 2010-аад оны эхээр өргөн хэрэглэж эхэлсэн түүхтэй.

• 2015 он: Улсын санхүүжилттэй ахлах сургуулийн сурагчдын 80 орчим хувь нь өөрийн гэсэн дижитал төхөөрөмжтэй болжээ.

• 2019 он: Өмнөх Засгийн газар хүүхдүүдийг бага наснаас нь дижитал ертөнцөд бэлтгэх зорилгоор цэцэрлэгүүдэд таблет заавал ашиглах шийдвэрийг сургалтын хөтөлбөрт оруулсан юм.

Шинэ Засгийн газрын бодлого ба тодорхой өөрчлөлтүүд

2022 онд эрх барьсан баруун төвийн эвслийн Засгийн газар боловсролын чиглэлийг өөрчилсөн. Либерал намын боловсрол хариуцсан төлөөлөгч Йоар Форселл: "Бид сургуулиудад дэлгэцийн хэрэглээг аль болох багасгахыг хүсэж байна. Ахлах ангийнхан бага зэрэг ашиглаж болно. Харин бага ангийн хүүхдүүд ерөөсөө дэлгэц ашиглах шаардлагагүй" хэмээн онцолжээ. Тэдний үзэж буйгаар дэлгэцгүй орчин нь хүүхдүүдийг илүү төвлөрүүлж, унших, бичих чадварыг нь сайн хөгжүүлдэг байна.

Бодлогын хүрээнд хийгдэж буй шинэчлэлтүүд:

• 2025 оноос эхлэн: Цэцэрлэгүүд дижитал төхөөрөмж заавал ашиглах шаардлагагүй болсон бөгөөд 2-оос доош насны хүүхэд таблет хэрэглэхгүй болсон.

• Утасны хэрэглээг хориглох: Энэ оны сүүлээс эхлэн сургуулиудад гар утасыг хичээлийн зориулалтаар ч ашиглахыг хориглоно.

• Санхүүжилт: Сурах бичиг болон багшийн гарын авлага худалдан авахад зориулж сургуулиудад 2.1 тэрбум крон (ойролцоогоор 200 сая ам.доллар) төсөвлөжээ.

• 2028 он: Сурах бичигт суурилсан шинэ сургалтын хөтөлбөр хэрэгжиж эхэлнэ.

Судлаачдын байр суурь ба бизнесийн салбарын эсэргүүцэл

Энэхүү бодлогыг хэрэгжүүлэхээс өмнө 2023 онд эрдэмтэн судлаачид, багш нар, төрийн байгууллагууд болон орон нутгийн захиргаатай зөвлөлдөх уулзалтууд зохион байгуулсан байна.

Стокгольмын Каролинска хүрээлэнгийн мэдрэлийн судлаач доктор Сиссела Натли болон олон улсын судалгаануудын дүгнэлтийг харвал:

• Анги доторх дэлгэцүүд хүүхдийн анхаарлыг сарниулдаг.

• Хүүхдүүд дэлгэц харж төвлөрлөө алддаг бөгөөд дэлгэцээс унших нь мэдээллийг ойлгоход илүү хүндрэлтэй байдаг.

• Бага насандаа дэлгэц их ашиглах нь тархины хөгжилд хүртэл сөргөөр нөлөөлж болзошгүй гэдгийг нотолж байна.

Гэсэн хэдий ч Шведийн технологийн салбар энэ бодлогыг хүчтэй эсэргүүцэж байна. Бизнесийн салбарынхны үзэж буйгаар хэт уламжлалт сургалт нь хүүхдүүдийг ирээдүйн ажилд хангалттай бэлтгэж чадахгүй бөгөөд орчин үед дижитал суурь ур чадвар бүх хүнд зайлшгүй шаардлагатай гэдгийг анхааруулж байгаа юм.