Туулын хурдны замын төсөл тойрсон маргаан үргэлжилсээр байна. Төслийн байгаль орчинд үзүүлэх нөлөөлөл, тэр дундаа ойн сан бүхий газарт хийх үнэлгээний талаар Ойн газраас албан ёсны тайлбар өглөө.

• Дүгнэлт гараагүй: "Туулын хурдны зам" төслийг хэрэгжүүлэгч "Хаоюань женерал констракшн" ХХК нь ойн экологи-эдийн засгийн үнэлгээ болон нарийвчилсан үнэлгээний талаар Ойн газраас ямар нэгэн санал, дүгнэлт аваагүй байна.

• Мэдээлэл дутуу: Төслийн гүйцэтгэгчээр ажиллаж буй "Текол" ХХК-иас 2026 оны 3 дугаар сард дүгнэлт гаргуулах хүсэлт ирүүлсэн боловч Ойн газраас шаардсан нэмэлт баримт бичгүүдийг ирүүлээгүй байна.

• Шаардлагатай өгөгдөл: Ойн газар нь замын трассын орон зайн өгөгдөл (полигон shapefile) болон огтлогдох модны эзлэхүүний тооцооллыг ирүүлэхийг 3 дугаар сарын 25-ны дотор шаардсан боловч өнөөдрийг (2026.04.22) хүртэл уг мэдээлэл хүргэгдээгүй байгаа аж.

Ойн газрын байр суурь: Туул голын дагуух 32 км урт, 29 метр өргөн авто замын трасс нь ойн санд хэрхэн нөлөөлөх тооцоо тодорхойгүй байгаа тул төслийг экологийн хувьд үнэлэх боломжгүй байна.

Асуудлын гол нь юу вэ?

Томоохон хэмжээний бүтээн байгуулалт эхлэхийн өмнө байгаль орчны нарийвчилсан үнэлгээ хийгдэж, холбогдох төрийн захиргааны байгууллагаас зөвшөөрөл авсан байх ёстой. Гэтэл 2.3 их наяд төгрөгийн өртөгтэй гэгдэж буй "Туул хурдны зам" төслийн хувьд мэргэжлийн байгууллагын шаардсан өгөгдөл, тооцооллыг ирүүлээгүй байгаа нь төслийн ил тод байдал болон байгаль орчны аюулгүй байдалд эргэлзээ төрүүлж байна.

Эх сурвалж: Ойн газрын 2026.04.23-ны өдрийн 01/347 тоот албан бичиг.