Ерөнхий сайдын захирамжаар байгуулагдсан Шатахууны хангамж, нийлүүлэлтийг тогтворжуулах шуурхай штабаас өнөөдөр /2026.08.13/ ээлжит хэвлэлийн бага хурлаа хийж, цаг үеийн нөхцөл байдлын талаар мэдээлэл өглөө.

Аж үйлдвэр, эрдэс баялгийн яамнаас (АҮЭБЯ) мэдээлснээр, өчигдөр ОХУ-аас Улаанбаатар хотод нийт 46 вагон буюу 2,700 гаруй тонн АИ-92 автобензин буужээ. Үүнээс эхний 23 вагоныг буулган:

• Нийслэлд: 75 ШТС-д 756 тонн,

• Орон нутагт: 49 ШТС-д 441 тонныг тус тус хүргээд байна.

Одоогийн байдлаар ОХУ-аас Монгол Улс руу нийт 152 вагон буюу 9,120 тонн АИ-92 автобензин замд явж байгаа юм.

"Ням гарагт нийслэлийн хэрэгцээг бүрэн хангана"

АҮЭБЯ-ны Төрийн нарийн бичгийн дарга Б.Дашпүрэв, "Өнгөрсөн хоёр хоногт түгээлт бага хийгдсэн ч ирэх Даваа гарагаас эхлэн улсын хэмжээнд түгээлт хэвийн болно" хэмээн тодотгов. Тэрбээр үргэлжлүүлэн:

"Бид өнөөдөр болон маргаашийн дотор орон нутгийн түгээлтийг нэмэгдүүлнэ. Мөн энэ ням гарагт нийслэлийн хэмжээнд шатахууны хэрэгцээг бүрэн хангах хэмжээний түгээлт хийхээр төлөвлөлөө. Ирэх долоо хоногоос улс орон даяар түлш, шатахууны нийлүүлэлт бүрэн хэвшнэ" гэв.

Төр, хувийн хэвшлийн хамтын ажиллагаа ба зохицуулалтууд

Шуурхай штабын хүрээнд салбар бүрийн байгууллагууд шатахууны нийлүүлэлтийг тасалдуулахгүй байхад анхааран ажиллаж байна:

• Төмөр замын тээвэр: "Улаанбаатар төмөр зам" ХНН-ээс шатахууны вагонуудыг богино хугацаанд шуурхай татан авч байна.

• Онгоцны түлш: БНХАУ-аас ачигдсан 2,000 тонн онгоцны түлш маргааш Замын-Үүд өртөөнд ирж, түгээлтэд бэлэн болно.

• Татварын хөнгөлөлт: Татварын ерөнхий газраас импортлогч аж ахуйн нэгжүүдийг татварын өртэй байсан ч дансыг нь хаахгүй байх шийдвэр гаргажээ.

• Замын хөдөлгөөн: Тээврийн цагдаагийн албанаас ШТС-уудын оочрыг зохицуулж, авто замын хөдөлгөөнд саад учруулахгүй байх арга хэмжээ авч байна.