Ардчилсан намын дарга О.Цогтгэрэл байгалийн баялгийн хуваарилалт, Баялгийн сангийн тухай хууль болон төсвийн бодлогын талаар байр сууриа илэрхийллээ. Тэрээр Засгийн газраас өргөн барьсан төсвийн төсөл нь одоо мөрдөгдөж буй хууль тогтоомжийг зөрчиж, Баялгийн болон Хуримтлалын сангаар дамжин иргэдийн дансанд орох ёстой хөрөнгийг төсвийн цоорхойг нөхөхөд шууд ашиглахаар оруулж ирснийг маш хариуцлагагүй үйлдэл хэмээн шүүмжлэв.

"Ногдол ашиг биш, хөрөнгөтэй иргэн"

АН-ын дарга О.Цогтгэрэл “Байгалийн баялгийн үр шимийг иргэдэд хүргэх асуудал бол зөвхөн нэг удаагийн 800 мянган төгрөг эсвэл бэлэн мөнгөний ногдол ашиг олгох төдийхөн сэдэв биш” гэдгийг онцоллоо. Ардчилсан намын баримталдаг зарчим бол иргэд баялагтаа эзэн байж, бодит өмч, хөрөнгө буюу хувьцаа эзэмшигч болох явдал юм.

Тэрээр Оюу толгой төслийн бодит боломжийн талаар дараах тооцооллыг танилцууллаа:

• Компанийн үнэлгээ: Оюу толгой нь нээлттэй компани биш ч ерөнхий тооцоогоор 30 гаруй тэрбум ам.доллар буюу 100 гаруй их наяд төгрөгийн үнэлгээтэй байх боломжтой.

• Монголын талын эзэмшил: Манай талын 34 хувийн эзэмшилд 10 гаруй тэрбум ам.доллар буюу орчим 36 их наяд төгрөгийн үнэлгээ ногдож байна.

• Иргэн бүрд ногдох боломж: Энэхүү 36 их наяд төгрөгийг Монгол Улсын 3.5 сая иргэнд хуваавал нэг иргэнд 10 сая төгрөгийн үнэлгээ бүхий хувьцаа (хөрөнгө) ногдож, нэмэлтээр жил бүр ногдол ашиг авах боломж бүрдэнэ.

Ингэж иргэд бодит хувьцаатай болсноор тухайн хөрөнгөө өвлүүлэх, зарах, барьцаалах боломжтой болж, зах зээлийн эдийн засгийн харилцаанд идэвхтэй оролцогч болно гэв.