Нийслэлийн зүгээс Улаанбаатар хотын авто замын түгжрэлийг шийдвэрлэх хамгийн том гарц гэж үзэж байгаа ч иргэдийн эсэргүүцэлтэй тулаад буй Туулын хурдны замын төслийн талаар УИХ-ын гишүүн Л.Оюун-Эрдэнэ байр сууриа илэрхийллээ. Тэрээр энэхүү бүтээн байгуулалтыг улс төржилгүйгээр, нийслэл хотын эрх ашгийн төлөө нэгдмэл байр сууринаас хэрэгжүүлэх ёстойг онцолж байна.

Л.Оюун-Эрдэнэ: Туулын хурдны зам ашиглалтад орсноор нийслэлийн түгжрэл 50-60 орчим хувиар буурах тооцоо гарсан. Богд уулын доогуур туннель гаргаж, Хөшигийн хөндийтэй холбох нь стратегийн хувьд хамгийн зөв хувилбар болохыг мэргэжилтнүүд зөвлөсөн. Нийслэлийг тойрсон нийт гурван том тойрог зам барих нэгдсэн шийдэл гарсан байна.

Төслийн өртөг өндөр байгаа талаарх олон нийтийн шүүмжлэлийн тухайд Л.Оюун-Эрдэнэ бодитой хандахыг хүслээ. Тэрээр "Мэдээж өртгийг бусад замтай харьцуулж шүүмжилж байгаа ч бид үүнийг барьж үзэх хэрэгтэй. Том төслүүд улс төржилтөөс болж гацдаг байж болохгүй" хэмээсэн юм. Санхүүжилтийн ил тод байдлыг хангахын тулд АТГ болон бусад холбогдох байгууллагууд хяналтаа тавьж ажиллах нь зүйтэй гэж үзэж байна.

Туулын хурдны зам төсөл гацсан тухайд тэрбээр, "Намууд хамтрахгүй байхад нэг ийм төвөгтэй зүйл болдог. Хамтарсан үед энэ төсөл хамтын автор болно. Харин хамтраагүй үед энэ төслийг Х.Нямбаатар явуулаад түгжрэлийн асуудлыг шийдчихвэл тэр "од" болох гээд байна шүү дээ" хэмээн хэлсэн юм.