Гаалийн байгууллага, тагнуул болон цагдаагийн байгууллагын хамтарсан хяналт шалгалтаар манай улсын хилээр их хэмжээний мансууруулах бодис нэвтрүүлж байсныг илрүүлэн таслан зогсоолоо.

Хэргийн нөхцөл байдал

2026 оны 04 дүгээр сарын 18-ны өдөр Станбул–Улаанбаатар чиглэлийн агаарын хөлгөөр зорчин ирсэн Монгол Улсын иргэн сэтгэцэд нөлөөт бодисыг хууль бусаар тээвэрлэж иржээ. Чингис хаан олон улсын нисэх буудлын гаалийн хяналтын бүсэд ачаа тээшийг рентген аппаратаар шалгах явцад сэжигтэй тохиолдол илэрсэн байна.

Шалгалтаар тухайн иргэн дагалдах ачаандаа байсан электрон бараан дотор Нэгдсэн Үндэстний Байгууллагын 1971 оны конвенцын II хавсралтад багтсан 417 грамм метамфетамин бодисыг нуун далдалсан байжээ.

Гаалийн байгууллагаас холбогдох хойшлуулшгүй ажиллагааг шуурхай явуулж, хэргийг Цагдаагийн ерөнхий газрын Хар тамхитай тэмцэх албанд шилжүүлсэн байна. Одоогийн байдлаар прокурорын хяналт дор мөрдөн шалгах ажиллагаа үргэлжилж байна.

Иргэдэд зориулсан сэрэмжлүүлэг

Сүүлийн үед гэмт бүлэглэлүүд мансууруулах бодисыг хилээр нэвтрүүлэхдээ дараах аргуудыг түгээмэл ашиглах болсныг хууль хяналтын байгууллагаас онцгойлон анхааруулж байна:

• Нуун далдлалт: Ахуйн хэрэглээний цахилгаан бараа, хүнсний бүтээгдэхүүн, бэлэг дурсгалын зүйлс дотор байршуулах.

• Дайвар ачаа: Бусдад итгэл төрүүлж, "Ойр дотны хүнд хүргээд өгөөч" хэмээн дайвар ачаа болгон өгч, гэмт хэрэгтээ ашиглах.

ЗӨВЛӨМЖ:

1. Гадаад улсад зорчихдоо танихгүй болон сайн мэдэхгүй хүнээс ямар ч төрлийн дайвар ачаа авахгүй байх.

2. Бусдын гуйлтаар ачаа тээш авсан тохиолдолд агуулгыг нэг бүрчлэн сайтар шалгах.

3. Өөрийн ачаа тээшинд тавих хяналтаа сайжруулж, хариуцлагаа ухамсарлан энэ төрлийн хүнд гэмт хэргийн золиос болохоос урьдчилан сэргийлнэ үү.

Энэ төрлийн гэмт хэрэг нь хувь хүний амьдрал, эрүүл мэндээс гадна улс орны аюулгүй байдалд заналхийлж буй тул иргэн бүр сонор сэрэмжтэй байхыг Гаалийн ерөнхий газраас анхааруулж байна.