Авлигатай тэмцэх газраас (АТГ) “Эрдэнэс критикал минералс” ТӨҮГ-ын захирал Д.Т-д холбогдох эрүүгийн хэргийг мөрдөн шалгаж дууслаа. Нийт 35 хавтас, 8319 хуудас бүхий нүсэр материалыг шүүхэд шилжүүлэх саналтайгаар прокурорын байгууллагад хүргүүлээд байна.

Д.Т-ийг 2026 оны 1 дүгээр сарын 10-ны өдрөөс эхлэн шалгаж эхэлсэн бөгөөд мөрдөн шалгалтаар дараах ноцтой баримтууд тогтоогджээ:

Үндэслэлгүй хөрөнгөжсөн: 2016 онд улс төрд нөлөө бүхий этгээдээр ажиллаж байхдаа хамаарал бүхий хүний нэрээр Сүхбаатар дүүрэгт 820 сая төгрөгийн орон сууц борлуулж, орлогоо тайлбарлаж чадаагүй.

Их хэмжээний хахууль: Хан-Уул дүүрэгт 400 мкв талбай бүхий тансаг зэрэглэлийн байрыг хөнгөлөлттэй үнээр авсан.

Давуу байдал олгосон: ТӨҮГ-ын захирлаар ажиллахдаа хууль бус тушаал өгч, 6600 тонн төмрийн хүдрийн баяжмалыг дараалал дайруулан тээвэрлэж, БНХАУ-ын компанид давуу байдал олгосон.

Бэлэн мөнгөний хахууль: “ХЕ” компанийн захирал Э-гээс бусдаар дамжуулан 100 сая төгрөг авсан нь тогтоогджээ.

Хэргийн явцад бэлэн хахуулийн 250 сая төгрөгийг хураан авч, эд мөрийн баримтаар гар утас, тамга зэргийг тооцсон байна. Мөн гэмт хэргийн замаар олсон байж болзошгүй 1.8 тэрбум төгрөгийн үл хөдлөх хөрөнгийн шилжилт хөдөлгөөнийг хязгаарлаж, битүүмжилжээ.

Эрүүгийн хуулийн заалтууд: Түүнийг үндэслэлгүйгээр хөрөнгөжсөн (22.10.2), хахууль авсан (22.4.3), эрх мэдэл, албан тушаалаа урвуулан ашигласан (22.1.3) зэрэг заалтуудаар яллагдагчаар татаад байна.