Зун цаг гарч, аялал зугаалга, амралтын улирал эхэлж байгаа ч байгалийн давагдашгүй хүчин зүйл болох үерийн аюул эрсдэл дагуулж эхэллээ. Хэнтий болон Хангайн нуруунаас эх авдаг томоохон гол мөрнүүдийн усны түвшин ганцхан хоногийн дотор огцом нэмэгдэж, түгшүүрийн харанга дэлдэж байна.

Иргэд, малчид, аялагчид та бүхнийг дараах мэдээлэлд онцгойлон анхаарал хандуулж, сонор сэрэмжтэй байхыг уриалж байна.

2026 оны 6 дугаар сарын 22-ны өдрийн байдлаар Хэнтий нурууны баруун хажуугаас эхтэй Хүдэр, Ерөө, Хангай нурууны араас усжих Орхон зэрэг голуудын усны түвшин өмнөх өдрөөс 50-100 см нэмэгдэж, Орхон гол Сүхбаатар сум орчимд олон жилийн дундаж түвшинг 40 см, Ерөө гол үерийн түвшинг 35 см, Хүдэр гол үерийн аюултай түвшинг 50 см даван хүчтэй үерлэж байна.

Маргаашийн төлөв байдал (2026.06.23)

Цаг уурын байгууллагын тооцооллоор маргааш буюу 6 дугаар сарын 23-ны өдөр Ерөө гол Дулаанхаан сум орчимд усны түвшин дахин 60 см-ээр нэмэгдэж, үерийн түвшинг 40 см даван үерлэх төлөвтэй байна. Нөхцөл байдал улам хүндрэх магадлалтай байгаа тул урьдчилан сэргийлэх хугацаа тун бага байна.

Гол мөрний сав дагуу суурьшиж, нутаглаж буй малчид, тариаланчид, аж ахуйн нэгжүүд болон аялаж, амарч яваа иргэд дараах зааварчилгааг чандлан мөрдөнө үү:

Голын эрэг дагуу бууж суурьшихгүй байх: Голын голдирол өөрчлөгдөх, ус хугацааны дотор гэнэт нэмэгдэх эрсдэлтэй тул эрэг хөвөөнд майхан барих, гэр хотоо байрлуулахаас эрс татгалзах.

Хүүхдэд тавих хараа хяналтаа чангалах: Бага насны хүүхдийг голын эрэг дагуу тоглуулахгүй байх, хараа хяналтгүй орхихгүй байх.

Зориулалтын бус хөвөгч ашиглахгүй байх: Гол руу зориулалтын болон зориулалтын бус (машины дугуйны дотор бүдүүн, гар хийцийн сал г.м) хөвөгч хэрэгсэл ашиглан орох, гол гатлахыг ТУЙЛАСААС ХОРИГЛОНО.

Санамж: Байгалийн урсгал, усны хүчийг дутуу үнэлж, өөрийн болон хайртай хүмүүсийнхээ амь насыг эрсдэлд бүү оруулаарай. Аюулгүй байдлаа хангаж, сонор сэрэмжтэй аялаарай!